اگر کسی کو ایک لاکھ روپے اس طور پر دیے جائیں کہ وہ کاسمیٹکس کے کاروبار میں وہ رقم استعمال کرے اور رقم دینے والے  کو اپنی  پوری رقم واپس لينے كا اختيارہو  جب کہ رقم لینے والا ہر ماہ ایک لاکھ روپے کا 2 فیصد، یعنی 2,000 روپے بطورِ منافع  ادا کرنے کا پابند ہو، تو یہ معاملہ ناجائز ہےکیونکہ اس صورت میں یہ رقم قرض  کے حکم میں ہے جس پر نفع مقرر کرنا سود کے زمرے میں آتا ہے۔

البتہ اس معاملے کی جائز صورت یہ ہے کہ ایک لاکھ روپے مضاربت کے طور پر دیے جائیں۔ اور یہ طے کیا جائے کہ اس رقم کو کاسمیٹکس کے جائز کاروبار میں لگائے گا اور کاروبار سے حاصل ہونے والے حقیقی منافع  میں دونوں کے لیے ایک مخصوص تناسب طے کیا جائے۔مثلاً دونوں پچاس پچاس فیصد لیں گےوغیرہ۔اس صورت میں جتنا نفع حاصل ہوگا اسی تناسب کے مطابق تقسیم ہوگا اور اگر نقصان ہوا تو سرمائےکا مالک وہ نقصان برداشت کرے گا۔

وفي الاشباه كل قرض جر نفعا حرام. (الدر المختار شرح تنوير الأبصار، كتاب البيوع، ص:430)

قال (المضاربة عقد على ‌الشركة ‌بمال ‌من أحد الجانبين) ومراده الشركة في الربح وهو يستحق بالمال من أحد الجانبين (والعمل من الجانب الآخر) ولا مضاربة بدونها.(العناية فی شرح الھدایۃ، كتاب المضاربة، ج:5 ص:86)