واضح رہے کہ کچھ کمپنیاں اس طرح کام کرتی ہیں کہ وہ اپنی مصنوعات کو روایتی مارکیٹنگ کے طریقہ کار کے بجائے افراد کے ایک باہمی نیٹ ورک کے ذریعے فروخت کرتی ہیں۔ ان کمپنیوں میں شامل ہونے کے لیے ابتدا میں رجسٹریشن فیس ادا کرنی پڑتی ہے اور پھر اس ممبر پر ایک مخصوص مقدار میں کمپنی کے پراڈکٹس خریدنا لازم ہوتا ہے اور پھر آگے نئے ممبرز کو کمپنی میں رجسٹرڈ کرانا ہوتا ہے، اور پھر ان کی رجسٹریشن فیس اور پراڈکٹس کی خریداری میں مخصوص کمیشن اس کو ملتا ہے۔ یوں یہ نیٹ ورک بڑھتا رہتا ہے اور ممبران کے کمیشن میں اضافہ ہوتا رہتا ہے۔ اس طرح مصنوعات کی تشہیر کو نیٹ ورک مارکیٹنگ یا ملٹی لیول مارکیٹنگ کہا جاتا ہے۔

نیٹ ورک مارکیٹنگ یا ملٹی لیول مارکیٹنگ کی بنیاد پر کام کرنے والی کمپنیوں کے ممبر بننے کے لیے اولاً مخصوص رقم ادا کرکے رجسٹریشن کرنی پڑتی ہے پھر اس کی مصنوعات میں سے کوئی چیز لازماً خریدنی پڑتی ہے۔ پھر اس کے بعد اگر مزید ممبر بنائے جائیں تو کمیشن ملتی ہے، شرعی لحاظ سے یہ معاملہ درست نہیں، کیونکہ اس میں ایک معاملے کو دوسرے کے ساتھ مشروط کیا جاتا ہے، یعنی کمپنی کے لیے ممبر بنانے کے معاوضے (کمیشن) کو کمپنی سے خریداری کرنے پر مشروط کیا جاتا ہے جو شرعاً جائز نہیں۔اسی طرح شرعی اعتبار سے دوسری خامی یہ ہے کہ ایک ممبر کے تحت جتنے آدمی رجسٹر ہوتے ہیں اور خریداری کرتے ہیں ان سب کی خریداری اور منافع میں اوپر کے ممبران کو کمیشن ملتا ہے، چاہے وہ بالواسطہ ہو یا بلا واسطہ، جبکہ بالواسطہ افراد کی خریداری پر کمیشن لینا شرعاً جائز نہیں، کیونکہ اس میں براہ راست کوئی عمل دخل نہیں ہوتا۔ تیسرا یہ کہ ممبران رجسٹریشن کرکے مہنگے داموں کمپنی کی مصنوعات خریدتے ہیں خواہ ان کو مصنوعات کی ضرورت ہو یا نہ ہو۔ وہ یہ رقم اس لالچ میں خرچ کرتے ہیں کہ آگے ان کو منافع حاصل ہوں گے حالانکہ وہ منافع غیر یقینی ہوتے ہیں، اگر ممبر بنائے تو مل جائیں گے ورنہ نہیں۔ گویا غیر یقینی منافع کے چکر میں بھاری رقم بلا ضرورت خرچ کی جاتی ہے اور یہ قمار (جوا) کی ایک شکل ہے جس سے واضح الفاظ میں قرآن مجید میں منع کیا گیا ہے۔

علاوہ ازیں ان کمپنیوں کے اہداف و مقاصد اور طریقہ کار پر نظر ڈالنے سے معلوم ہوتا ہے کہ ان کا اصل مقصد کمیشن کی لالچ کو ایک جھانسہ بنا کر اپنا نیٹ ورک پھیلانا اور لوگوں پر اپنی مصنوعات مہنگے داموں فروخت کرکے منافع کمانا ہے۔ اس لیے ان کے ساتھ ممبر شپ اختیار کرکے کمیشن لینا شرعاً جائز نہیں۔

قال اللہ تعالی :يَاأَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ (المائدة:90(

عن عبد الرحمن بن عبد الله بن مسعود، عن أبيه، قال: نهى رسول الله صلى الله عليه وسلم عن صفقتين في صفقة واحدة.(مسند أحمد،ج:6،ص:324)

فلو جوزناہ لکان استحقاقا بغیر عمل ولم یرد بہ الشرع.(الھدایۃ، کتاب المساقاۃ، ج :4 ص: 430)

(قوله ولا بيع بشرط) شروع في الفساد الواقع في العقد بسبب الشرط لنهيه صلى الله عليه وسلم عن بيع وشرط. (رد المحتار مع الدر المختار ، مطلب في البيع بشرط فاسد،ج:5 ص:84)

لأن القمار من القمر الذي يزداد تارة وينقص أخرى، وسمي القمار قمارا لأن كل واحد من المقامرين ممن يجوز أن يذهب ماله إلى صاحبه، ويجوز أن يستفيد مال صاحبه وهو حرام بالنص۔(رد المحتار مع الدر المختار، كتاب الحظر والإباحة، باب الإستبراء وغيره، فصل في البيع ، ج:9 ص:577)

الأمور بمقاصدها.يعني: أن الحكم الذي يترتب على أمر يكون على مقتضى ما هو المقصود من ذلك الأمر.( مجلة الأحكام العدلية، ص16)