جس عورت کا شوہر اس طرح گم ہو جائے کہ اس کی زندگی اور موت کا کچھ پتہ نہ چلے اور اس سے مزید انتظار اور صبر نہ ہوسکتا ہو، تو ایسی مجبوری میں امام مالک رحمہ اللہ کے مذہب کے مطابق فتویٰ دیا جاتا ہے۔ جس کا حاصل یہ ہے کہ وہ عورت مسلمان حاکم کی عدالت میں دعویٰ دائر کرے اور گواہوں کے ذریعے یہ ثابت کرے کہ فلاں شخص اس کا شوہر ہے، پھر گواہوں ہی کے ذریعے اس کا لاپتہ ہونا بھی ثابت کرے۔ اس تمام کارروائی کے بعد قاضی ہر ممکن صورت سے اس شخص کی تفتیش و تلاش کروائے۔ جب قاضی اس شخص کے ملنے سے بالکل ناامید ہو جائے، تو عورت کو چار سال انتظار کرنے کا حکم دے۔ اگر ان چار سالوں میں شوہر آ جائے تو بہت خوب، ورنہ مدت پوری ہونے پر عورت دوبارہ عدالت میں درخواست پیش کرے، جس پر قاضی شوہر کے مردہ ہونے کا فیصلہ سنا دے۔ اس کے بعد عورت چار ماہ دس دن عدت گزار کر دوسری جگہ نکاح کر سکتی ہے۔

صورتِ مسئولہ میں سائلہ محض سوال میں ذکر کردہ خبروں کی بنیاد پر عدت گزار کر دوسرا نکاح نہیں کر سکتی، بلکہ عدالت سے "مفقود الخبر" کا فیصلہ لینا ضروری ہے۔ نیزاگر سائلہ کے لیے چار سال کی مدت گزارنا مشکل ہواور معصیت میں مبتلا ہونے کا قوی خطرہ ہو، تو اس صورت میں اس بات کی بھی گنجائش ہے کہ قاضی چار سال کے بجائے صرف ایک سال کے انتظار کا حکم دے اور ایک سال گزرنے پر عورت کے طلب کرنے پر اس کا نکاح فسخ کر دے۔ اس صورت میں فسخِ نکاح کے بعد عورت چار ماہ دس دن عدت گزار کر دوسری جگہ نکاح کر سکتی ہے۔

وأما المفقود في بلاد الإسلام الي قوله فلها ان ترفع امرها الي الخليفةأو القاضي أو من يقوم مقامهما في عدمهما ليتفحصوا من حال زوجها بعد أن تثبت الزوجيةوغيبة الزوج والبقاء في العصمة الی الآن۔۔۔ الخ"(الحيلة الناجزه، ص: 127)

قال مالك والأوزاعي:إلى أربع سنين، فينكح عرسه بعدها كما في النظم، فلو أفتى به موضع الضرورة، ينبغي أن لا بأس به على ما أظن۔ (القهستاني، شمس الدين محمد، جامع الرموز، كتاب المفقود، ج:3، ص: 390)

ومذهب الحنفية في الباب، وإن كان قوياّ روايةّ و درايةّ، ولكن المتأخرين منا قد أجازوا الإفتاء بمذهب مالك عند الضرورة نظراّ إلى فساد الزمان۔ (إعلاء السنن، كتاب المفقود، باب إمرأته حتى ياتيها البيان، ج:13، ص:67)