واضح رہے کہ مروجہ پگڑی کا معاملہ شرعاً خرید و فروخت یا کرایہ داری کا  معاملہ نہیں ، بلکہ یہ  ایک غیر شرعی معاملہ ہے۔ اس لیے اس قسم کا معاہدہ ابتداءً درست نہیں۔ پگڑی کی بنیاد پر دکان یا مکان لینے سے کرایہ دار اس دکان کا شرعاً مالک نہیں بنتا، بلکہ دکان بدستور اصل مالک ہی کی ملکیت رہتی ہے، جبکہ پگڑی دینے والا صرف اپنی ادا کردہ رقم کا حق دار ہوتا ہے۔

لہٰذا صورتِ مسئولہ میں سائل کے والد 35 سال قبل دکان پگڑی پر لینے سے اس دکان کے مالک نہیں بنےتھے ،لہٰذا جب مالک اپنی دکان واپس لے تو صرف اتنی ہی رقم کے مطالبہ کا حق دار ہوگا جو اس کے والد صاحب نے بطور پگڑی ادا کی تھی۔ موجودہ مارکیٹ ریٹ کے مطابق پگڑی کا مطالبہ شرعاً درست نہیں، بلکہ صرف اپنی ادا کردہ پگڑی کی رقم کا حق دار ہوگا۔ البتہ اگر معاہدہ کی رو سے ابتداءً ادا کی گئی پگڑی کی رقم کرایہ کا حصہ تھا، یعنی وہ رقم مالک کو بطور پیشگی کرایہ دی گئی ہو اور اس کے بدلے کرایہ دار کو مدتِ اجارہ میں نفع کا حق حاصل ہوا ہو، تو ایسی صورت میں وہ رقم مالکِ دکان کی ملکیت بن چکی  ہے ، لہٰذا کرایہ داری ختم ہونے کے بعد کرایہ دار اس رقم کا مطالبہ کرنے کا  بھی شرعاً حق دار نہیں ہوگا۔

البتہ اگر دکان میں سائل یا اس کے والد صاحب نے اپنی ذاتی رقم سے کوئی چیز لگائی ہو  تو ایسی صورت میں باہمی رضامندی سے اس کی قیمت وصول کی جا سکتی ہے، یا اگر انہیں الگ کرنا ممکن ہو اور اس سے دکان کو نقصان نہ پہنچتا ہو تو انہیں الگ کرنے کا بھی حق ہوگا۔

وفي الأشباه لا يجوز الاعتياض عن الحقوق المجردة كحق الشفعة وعلى هذا لا يجوز الاعتياض عن الوظائف بالأوقاف، وفيها في آخر بحث تعارض العرف مع اللغة."

(قوله: وفيها) :مطلب: لا يجوز الاعتياض عن الحقوق المجردة (قوله: لا يجوز الاعتياض عن الحقوق المجردة عن الملك) قال: في البدائع: الحقوق المفردة لا تحتمل التمليك ولا يجوز الصلح عنها."(ردالمحتار على الدر المختار، كتاب البيوع، ج:4، ص: 518)