واضح رہے کہ انسان کی شناخت مختلف بنیادوں پر ہوتی ہے، جیسے اس کا ذاتی نام، والد کا نام، خاندان، قبیلہ، برادری، علاقہ یا پیشہ وغیرہ۔ تاہم ایک مسلمان کے لیے فضیلت کا  اصل معیار نسب یا لقب نہیں بلکہ تقویٰ اوراخلاق ہے۔ اسی وجہ سے بعض اہلِ علم اور بزرگ اس بات کو پسند کرتے ہیں کہ اگر کسی لقب یا نسبت کے استعمال سے تکبر، تفاخر یا دوسروں پر برتری جتانے کا پہلو پیدا ہو تو اس سے اجتناب کیا جائے، تاہم اگر مقصد صرف صحیح خاندان یا قبیلہ کی شناخت، نسب کی حفاظت یا قانونی و سماجی تعارف ہو تو اس میں  کوئی حرج نہیں۔

صورتِ مسئولہ میں اگر سائل کا تعلق حقیقتاً عباسی برادری سے ہو تو وہ سرکاری دستاویزات یا دیگر قانونی ریکارڈ میں اپنے نام کے ساتھ "عباسی" لکھ سکتا ہے، اس میں شرعاً کوئی حرج نہیں۔ اسی طرح اگر "سردار" اس کے خاندان یا سماجی شناخت کا درست لقب ہو تو اسے بھی اپنے نام کے ساتھ لکھنا جائز ہے، البتہ اس سے دوسروں پر فخر جتانا، برتری ظاہر کرنا یا تکبر کا اظہار مقصود  نہ ہو، بلکہ صرف صحیح خاندانی یا قبائلی شناخت واضح کرنا مقصود ہو۔ نیز یہ بھی ضروری ہے کہ یہ نسبت اور لقب حقیقت پر مبنی ہوں، ان میں کسی قسم کا جھوٹ یا غلط دعویٰ شامل نہ ہو۔

قال الله تعالى:﴿يَاأَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ﴾۔۔۔ وفي هذه الآية ما يدلك على أن التقوى هي المراعى عند الله تعالى وعند رسوله دون الحسب والنسب.( الجامع لأحكام القرآن للقرطبي،ج:16،ص:340)

واتفقوا على جواز ذكره بذلك على جهة التعريف لمن لا يعرفه إلا بذلك ودلائل كل ما ذكرته مشهورة۔۔۔۔۔ واتفقوا على استحباب اللقب الذي يحبه صاحبه فمن ذلك أبو بكر الصديق اسمه عبد الله بن عثمان ولقبه عتيق.(المجموع شرح المهذب،كتاب الحج،باب العقيقة، 8/ 441)