واضح رہے کہ کسی دوسرے کا مال ناحق طریقے سے لینا جائز نہیں۔نیز ملازمت میں سچائی اور امانت داری کا مظاہرہ نہایت ضروری ہے۔ لہذا اگر کسی غلط اندراج یا کسی ذمہ دار شخص کی بے ضابطگی کی وجہ سے ملازم کو ایسی اجرت ملنے لگے جس کا وہ حقیقتاً مستحق نہیں تو اس کا لینا اس کے لیے جائز نہیں ۔

لہٰذا صورتِ مسئولہ کے مطابق چونکہ سائل نے صرف ایک گھنٹہ اوور ٹائم کیا تھا، اس لیے وہ صرف اسی ایک گھنٹے کی اجرت کا مستحق ہے۔ فورمین کی جانب سے جمعہ کے دن کے مزید چار گھنٹے، جن میں سائل نے کوئی کام نہیں کیا، اس کے نام درج کر دینا شرعاً جائز نہیں، اور ان چار گھنٹوں کی اضافی اجرت لینا بھی جائز نہیں ۔لہذا  سائل پر لازم ہے کہ چار گھنٹوں کی جو اضافی اجرت لی ہے اس کے بدلے چار گھنٹے اضافی کام   کرکےاوور ٹائم درج نہ کرےیا حتی الامکان کمپنی تک اضافی رقم پہنچانے  کا انتظام کرے، مثلاً کمپنی کے متعلقہ شعبہ، اکاؤنٹس یا کسی ایسے ذمہ دار کے ذریعے جو کمپنی کی طرف سے یہ رقم وصول کرنے کا اختیار رکھتا ہو اس کو واپس کرے یا  اگر کوشش کے باوجود کمپنی تک رقم پہنچانے یا اضافی کام کرنے  کی کوئی صورت نہ ہو، تو ایسی صورت میں اس اضافی رقم کو کمپنی کی طرف سے فقراء و مساکین پر صدقہ کر دے، اور خود اس سے کوئی نفع حاصل نہ کرے۔

قال الله تعالى: ﴿يٰٓاَيُّهَا الَّذِينَ اٰمَنُوا لَا تَأۡكُلُوٓا أَمۡوٰلَكُم بَيۡنَكُم بِالۡبٰطِلِ إِلَّآ أَن تَكُونَ تِجٰرَةً عَن تَرَاض مِّنكُمۡۚ﴾ [النساء: 29]

عَنْ أَنَسِ بْنِ مَالِكٍ،أَنَّ رَسُولَ اللَّهِ صلى الله عليه وسلم قَالَ: لَا يَحِلُّ مَالُ امْرِئٍ مُسْلِمٍ إِلَّا بِطِيبِ نَفْسِهِ.( سنن الدارقطني، كتاب البيوع، ج:3، ص:424)

والحاصل أنه إن علم أرباب الأموال وجب رده عليهم، وإلا فإن علم عين الحرام لا يحل له ويتصدق به بنية صاحبه.(رد المحتا رعلى الدر المختار، باب البيع الفاسد،ج:5، ص:99)