یاد رہے کہ کچھ امور ایسے ہیں جو چاہے سنجیدگی میں کہے جائیں، گپ شپ کے دوران زبان سے نکلیں، یا کسی کے دباؤ میں آکر کہے جائیں، وہ بہرصورت واقع ہو جاتے ہیں۔ ان میں سے ایک ''قسم کھانا'' بھی ہے۔ لہذا اگر مجبوراًقسم کھا کر وہ قسم توڑ دی جائے  تو اس پر کفارہ بھی لازم ہو جاتا ہے نیز یہ بھی واضح رہے کہ اگر کوئی شخص قسم کھانے والے کو زبردستی اس کام کے کرنے پر مجبور کر دے  جس کی اس نے قسم کھائی تھی اوروہ   اس کا م کو کرے، تو ایسی صورت میں   قسم ٹوٹ جائے گی اور اس پر کفارہ یمین لازم ہوگا۔

صورت مسئولہ  کے مطابق اگر کوئی شخص کسی کو مجبور کرے کہ وہ قسم کھائے کہ  میں یہ کام نہیں کروں گا، تو اس سے شرعاً قسم منعقد  ہو   گی۔ لہذا قسم کھانے والا شخص،اگر کسی کے زبردستی مجبور کرنے پر وہی کام کر گزرے جس کے نہ کرنے کی اس نے قسم اٹھائی تھی، تو ایسی صورت میں اس کی قسم ٹوٹ جائے گی اور اس پر کفارہِ یمین لازم ہوگا۔

 واليمين المنعقدة: هي الحلف على الأمر المستقبل أن يفعله أو لا يفعله فإذا حنث في ذلك لزمته الكفارة…والقاصد في اليمين والمكره والناسي سواء ومن فعل المحلوف عليه مكرها أو ناسيا سواء. (مختصر القدوري، ص: 209)

والقاصد في اليمين والمكره والناسي سواء " حتى تجب الكفارة لقوله عليه الصلاة والسلام ثلاث جدهن جد وهزلهن جد النكاح والطلاق واليمين…ومن فعل المحلوف عليه مكرها أو ناسيا فهو سواء " لأن الفعل الحقيقي لا ينعدم بالإكراه وهو الشرط وكذا إذا فعله وهو مغمى عليه أو مجنون لتحقق الشرط حقيقة. (الهداية في شرح بداية المبتدي، ج: 4، ص: 4)