اگر کسی مسلمان  سے ایسا کلام صادر ہو جائے جس میں کفر اور عدم کفر(اسلام سے خارج ہونے،اور نہ ہونے)دونوں  کا احتمال ہو، البتہ عدم کفر پر قرینہ موجود ہو تو احتیاط اسی میں ہے کہ اس کی تکفیر نہ کی جائے، گو کہ ایسے کلام سے اجتناب اور توبہ بہر حال لازم ہے۔

لہذا سائل نے اپنے دوست کے لیے تحقیر کے طورپر جو الفاظ استعمال کیے ہیں کہ ''اللہ تعالی کے ساتھ پاؤں ختم ہوگئےتھے اس لیے تمہیں آدھا پاؤں ملا''اگر واقعی اس کا مقصد ان الفاظ سے اللہ تعالی کے لیےصفت عجز ثابت کرنا نہیں تھا بلکہ صرف دوست کو تنگ کرنا مقصود تھا تو اس سے کفر کا حکم نہیں لگے گا تاہم چونکہ ان کلمات سے بظاہر اللہ تعالی کی طرف عجز کی نسبت کا وہم پیدا ہوتا ہے اس لیے سائل پر سچے دل کے ساتھ ان الفاظ سے توبہ  کرنا لازم ہے اور آئندہ کے لیے ان الفاظ کے استعمال سے اجتناب ضروری ہے۔

قال الله تعالى: ﴿يَٰٓأَيُّهَا ٱلَّذِينَ ءَامَنُواْ لَا تَقُولُواْ رَٰعِنَا وَقُولُواْ ٱنظُرۡنَا وَٱسۡمَعُواْۗ﴾ [البقرة: 104]

لايفتى بكفر مسلم أمكن حمل كلامه على محمل حسن أو كان في كفره اختلاف.(رد المحتار على الدر المختار، كتاب الجهاد، ج:4، ص:258)

والمختار للفتوى في جنس هذه المسائل أن القائل بمثل هذه المقالات إن كان أراد الشتم ولا يعتقده كافرا لا يكفر، وإن كان يعتقده كافرا فخاطبه بهذا بناء على اعتقاده أنه كافر يكفر كذا في الذخيرة.( الفتاوى العالمكيرية، كتاب السير، ج:2، ص:278)