واضح رہے کہ مضارب اور رب المال  آپس میں جب عقد مضاربت ختم کریں توجو رقم نقد کی صورت میں موجود ہو،اس سے مزید خریداری نہیں کی جائے گی ۔ اور مضاربت کے سرمایہ سے  اگر مشینری یا سامان وغیرہ خریداگیا ہو تو اس کو بیچ کر  نقد رقم حاصل کی جائے گی۔ اس کے بعد حاصل شدہ مجموعی رقم میں سے سب سے پہلے  رب المال کو اس کا اصل سرمایہ (راس المال)حوالہ کیا جائے گا اور اس کے بعد اگر رقم بچ جائے تو اس کو آپس میں طے شدہ  نسبت کے مطابق بطور منافع تقسیم کیا جائے۔

صورت مسئولہ کے مطابق رب المال کو اصل  سرمایہ واپس کر دیا گیا ہے اور حاصل شدہ منافع بھی طے شدہ نسبت کے مطابق تقسیم کر دیا گیا ہے، تاہم جو سامان یا مشینری وغیرہ باقی ہے، تو مضارب کےلیے  اکیلے طور پر اس کا لینا جائز نہ ہوگا، بلکہ  ان اثاثوں کو بیچنے  سے حاصل ہونے والی رقم کو مضارب اور رب المال  آپس میں  طے شدہ نسبت کے مطابق تقسیم کریں گے ۔

ومن شرطها أن يكون الربح بينهما مشاعا لا يستحق أحدهما دراهم مسماة" من الربح لأن شرط ذلك يقطع الشركة بينهما ولا بد منها كما في عقد الشركة.( الهداية في شرح بداية المبتدي، كتاب المضاربة، ج:3، ص:200)

وإذا استوفى رأس المال، فإن فضل شيء كان بينهما لأنه ربح وإن نقص فلا ضمان على المضارب" لما بينا.( الهداية في شرح بداية المبتدي، كتاب المضاربة، ج:3، ص:207)