واضح رہے کہ عاقدین کے مابین خرید و فروخت کا معاملہ طے پاتے وقت اس بات کا لحاظ ضروری ہے کہ مبیع(فروخت کی جانے والی چیز)بائع (فروخت کرنے والا)کی ملکیت اور قبضہ میں موجود  ہو چنانچہ ا گر مبیع بائع کی ملکیت اورقبضہ میں نہ ہو تو معاملہ جائز نہیں ہوتا۔

لہذا صورت مسئولہ کے مطابق آن لائن کاروبار میں اگر مبیع بیچنے والے کی ملکیت اور قبضے میں نہ ہو اور وہ محض کسی چیز کا  اشتہار یا تصویر دکھا کر کسی کو فروخت کر دے، تو یہ صورت شرعاً جائز نہیں ہے۔ اس سے حدیثِ مبارک میں منع فرمایا گیا ہے۔ نیز اضافی رقم نہ لینےیا اخراجات کے بقدر رقم لینے سے شرعی حکم پر کوئی  اثر نہیں پڑتا، بلکہ ایسا معاملہ بہر حال ناجائز ہے۔ لہذا اس سے اجتناب ضروری ہے۔

البتہ اس کے جواز کی یہ صورت بن سکتی ہےکہ گاہک سے آرڈر لیتے وقت حتمی معاملہ نہ کیا جائے، بلکہ فروختگی کا وعدہ کیا جائے، پھر وہی چیز متعلقہ کمپنی یا سپلائر سے خرید کر خود یا وکیل کے ذریعے قبضہ میں لی جائے پھر کسٹمر سے معاملہ کر کے اس کو بھیج دیا جائے۔ خواہ دوبارہ باقاعدہ ایجاب وقبول ہو یا تعاطی کے ذریعے بیع ہو۔ تعاطی کا مطلب یہ ہے کہ فروخت کنندہ سامان بھیج دے اور خریداراس کی قیمت ارسال کردے۔ جواز کی دوسری صورت یہ ہے کہ سائل اس سپلائر کی جانب سے اس کا مال فروخت کرنے کا وکیل  بن جائے اور اس کے لیے ہی وہ چیز فروخت کرے، جبکہ اپنے لیے کمیشن یا متعین اجرت کا معاہدہ کرے تو یہ صورت بھی جائز ہے۔

عن حكيم بن حزام قال: بايعت رسول الله صلى الله عليه وسلم على أن لا أخر إلا قائما.قال: قلت:يا رسول الله، الرجل يسألني البيع، وليس عندي، أفأبيعه؟ قال:"لا تبع ما ليس عندك. (السنن الكبرى للبيهقي، كتاب البيوع، ج:8 ص:95)

(ومنها) أن يكون مملوكا.لأن البيع تمليك فلا ينعقد فيما ليس بمملوك…(ومنها) وهو شرط انعقاد البيع للبائع أن يكون مملوكا للبائع عند البيع فإن لم يكن لا ينعقد، وإن ملكه بعد ذلك بوجه من الوجوه إلا السلم خاصة، وهذا بيع ما ليس عنده، ونهى رسول الله صلى الله عليه وسلم عن بيع ما ليس عند الإنسان، ورخص في السلم. (بدائع الصنائع، كتاب البيوع، فصل واما الذی يرجع الی المعقود عليه، ج:5، ص:147)