واضح رہے کہ جس تالاب کا حجم "دہ دردہ" (یعنی تقریباً 225 مربع فٹ ) یا اس سے زیادہ ہو، وہ فقہی اعتبار سے بہتے پانی کے حکم میں شمار ہوتا ہے۔ چنانچہ اگراس میں کوئی نجاست گر جائے تو محض نجاست کے گرنے سے پانی ناپاک نہیں ہوتا، جب تک اس کے اثرات (رنگ، بو یا ذائقہ) پانی میں ظاہر نہ ہوں۔ اور اگر تالاب  کا حجم اس مقدار سے کم ہو اوراس میں نجاست گرنے کا یقین ہو جائے تو سارا پانی ناپاک شمار ہوگا، اور اس سے وضو یا غسل کرنا جائز نہیں ہوگا۔

صورتِ مسئولہ  کے مطابق اگرسوئمنگ پول  ( 225 مربع فٹ )یا اس سے بڑا ہو، تو  وہ ماءِ جاری (بہتے پانی) کے حکم میں شمار ہوگا۔ ایسے سوئمنگ پول میں اگر کوئی نجاست گر جائے تو جب تک اس کے اثرات پانی میں ظاہر نہ ہوں، یعنی پانی کا رنگ، بو یا ذائقہ تبدیل نہ ہو، اس پانی سے وضو اور غسل کرنا جائز ہے۔ اور اگر سوئمنگ پول مذکورہ مقدار سے کم ہو اور اس میں نجاست گرنے کا یقین ہو جائے، تو اس کا پانی ناپاک شمار ہوگا، اور اس سے وضو یا غسل کرنا جائز نہیں ہوگا۔

الحوض إذا کان عشرًا في عشر جاز التوضؤ منه والاغتسال فیه.(الفتاوى السراجية، كتاب الطهارة، باب ما يجوز به الوضوء والغسل، ص:33)

الحوض الکبیر مقدر بعشرة أذرع في عشرة أذرع و علیه الفتوی.(خلاصة الفتاوى، كتاب الطهارة، ج:1، ص:6)