واضح رہے کہ ایک شخص کے سرمایہ اور دوسرے کی محنت سے چلنے والا کاروبار"عقدِ مضاربت" کہلاتا ہے۔ مضاربت میں نفع  مضارب اور رب المال (مالکِ سرمایہ) کے مابین کسی خاص  طے شدہ تناسب سےتقسیم  ہوتا ہے اورحقیقی  نقصان کا ذمہ دار صرف رب المال (مالکِ سرمایہ) ہوا کرتا ہے۔ مضاربت  کی شرائط میں سے یہ بھی ہے کہ منافع میں رب المال اور مضارب کا حصہ اجزاء یعنی نصف، ربع یا ثلث کے اعتبار سے معلوم ہو۔ متعین مقدار مقرر کرنا درست نہیں۔ بالفرض کسی ایک کے لیے منافع میں خاص معین مقدار مقرر کی جائے، مثلاً یہ کہ رب المال کہے کہ مجھے ماہانہ پانچ ہزار روپے دو گے، تو اس شرط سے عقدِ مضاربت فاسد ہو جاتا ہے۔

بیان کردہ تفصیل کو مدِ نظر رکھتے ہوئے سوال میں مذکور یہ معاملہ جائز نہیں، کیونکہ اس میں سرمایہ کے مالک کو ہر ماہ متعین طور پر پانچ ہزار نفع دینے کا معاملہ طے ہوا ہے۔ اور دو سال بعد پورا سرمایہ واپس کرنے کی شرط لگائی گئی ہے۔ یہ ایک سودی معاملہ ہے، اس لیے اس کو فوراً ختم کر کے توبہ کی جائے۔

ومن شرطها أن يكون الربح بينهما مشاعا لا يستحق أحدهما دراهم مسماة" من الربح …لفساده فلعله لا يربح إلا هذا القدر. (الهداية، كتاب المضاربة، ج:3، ص:200)