واضح رہے کہ بیوی کو مہر دینا شوہر کی ذمہ داری ہے، شوہر کے علاوہ کسی پر مہر دینا لازم نہیں ،البتہ اگر باپ دادا   یا کوئی اور اپنی طرف سے مہر دینا چاہے تو یہ اس کی طرف سے ہدیہ اور تبرع شمار ہوگا ،نیزلڑکی کو  شادی  کے موقع پر جو زیورات سسرال والوں کی طرف سے ملتے ہیں، اگراس میں سسرال والوں نے اس بات  کی صراحت کی ہو  کہ یہ  بطورِ عاریت یعنی صرف استعمال کرنے کے لیے ہیں  تو  پھر یہ  زیورات  لوٹانا ضروری ہوگا، لیکن  اگرسسرال والوں نے مہر کے طور پر یا ہبہ کے طور پر دی ہوں، تو پھر یہ اس لڑکی کی ملکیت شمارہوگی،اور اگر زیورات دیتے وقت کسی قسم کی صراحت نہیں  کی تھی تو پھر اس میں علاقے اور خاندان کے  عرف کا اعتبار ہوگا،اگرعرف و رواج میں اس طرح زیورات دینا عاریت شمار کیا جاتا ہو، تو پھر اس لڑکی پر ان زیورات کا واپس کرنا لازم ہے، اوراگر عرف میں یہ مہر یا ہبہ شمار ہو کر پہنائے جاتے ہو ں، تو پھر یہ لڑکی کی ملکیت شمار ہوگی ۔

صورت مسئولہ کے مطابق اگرسائل کی بیٹی نے اپنی بھابھی کو یہ زیورات دیتے ہوئے عاریت کی صراحت کی تھی ،یا عرف و رواج میں یہ عاریت شمار ہوتی ہو،تو پھر یہ عاریت ہوگی اور اس لڑکی پر اس کا واپس کرنا لازم ہے،اور اگر عاریت  کی صراحت نہ ہو ،اور نہ عرف میں اسے عاریت سمجھا جاتا ہو،تو پھر یہ اس لڑکی کی ملکیت ہوگی۔

‌وإذا ‌بعث ‌الزوج ‌إلى ‌أهل ‌زوجته ‌أشياء ‌عند ‌زفافها منها ديباج فلما زفت إليه أراد أن يسترد من المرأة الديباج ليس له ذلك إذا بعث إليها على جهة التمليك، كذا في الفصول العمادية جهز بنته وزوجها ثم زعم أن الذي دفعه إليها ماله وكان على وجه العارية عندها وقالت: هو ملكي جهزتني به أو قال الزوج ذلك بعد موتها فالقول قولهما دون الأب وحكى عن علي السغدي أن القول قول الأب وذكر مثله السرخسي وأخذ به بعض المشايخ وقال في الواقعات إن كان العرف ظاهرا بمثله في الجهاز كما في ديارنا فالقول قول الزوج، وإن كان مشتركا فالقول قول الأب، كذا في التبيين. قال الصدر الشهيد - رحمه الله تعالى - وهذا التفصيل هو المختار للفتوى.)الفتاوى الهندية، كتاب النكاح، باب المهر، الفصل السادس عشر في جهاز البنت،ج:1،ص:327)

والمعتمد ‌البناء ‌على ‌العرف ‌كما ‌علمت.(رد المحتار على الدر المختار ،كتاب النكاح ،باب المهر،مطلب أنفق على معتدة الغير،ج:3،ص:157)