واضح رہے کہ جو مال و جائیداد کسی شخص کی وفات کے وقت اُس کی ملکیت میں موجود ہو، وہ شرعی طور پر میراث میں شامل ہوتی ہے اور اس پر میراث کے احکام لاگو ہوتے ہیں، اسی طرح سرکاری  اداروں میں ملازمین کی تنخواہوں سے کی گئی کٹوتی کے ذریعے جمع شدہ  رقم بھی ملازم کی ملکیت ہوتی ہے، اس لیے وفات کے بعد ان پر بھی میراث کے اصول لاگوہوں گے، تاہم اگر کوئی ادارہ اپنی طرف سے کسی ملازم یا اُس کے ورثاء کو اضافی رقم بطور امداد یا عطیہ دے، تو وہ رقم ادارے کی پالیسی و قواعد کے مطابق تقسیم کی جائے گی، اس میں میراث کے احکام جاری نہیں ہوں گے۔

صورت مسئولہ کے مطابق مرحوم کی وفات کے بعدسرکار کی طرف سےجو رقم ملی ہےاس مین سے جو رقم مرحوم کی تنخواہ سے کٹوتی کی صورت میں جمع ہوئی تھی وہ میراث میں تقسیم ہوگی، لہذا اس کو مرحوم کے والدین، بیٹوں اور بیٹیوں میں شرعی طریقہ کار کے مطابق تقسیم کیا جائے گا، جب کہ اس میں مرحوم کے بھائیوں کا کوئی حق نہیں اور جو رقم ادارے کی طرف سے بطور عطیہ ملی ہو، اس کوادارے کی پالیسی کے مطابق تقسیم کیا جائے گا، یعنی ادارہ جن ورثاء کو دینا چاہے وہی اس رقم کے مالک ہوں  گے۔

والتصرف ‌في ‌ملك ‌الغير من غير إذنه محظور في الأصل. (بدائع الصنائع في ترتيب الشرائع، ج:7، ص:22)

العطاء ‌لا ‌يورث كذا في صلح البزازية. (الأشباه والنظائر لابن نجيم، ص:256)

لا يجوزلأحد من المسلمين ‌أخذ ‌مال ‌أحد ‌بغيرسبب ‌شرعي. (البحرالرائق، فصل في التعزير، ج:5، ص:68)

لأن التركة في الاصطلاح ما تركه الميت من الأموال ‌صافيا ‌عن ‌تعلق ‌حق ‌الغير بعين من الأموال. (قرة عيون الأخيار تكملة رد المحتار على الدر المختار، ج:7، ص: 350)