اگر کسی شخص نے اپنے کسی وارث کے لیے وصیت کی ہو تو وارث کے حق میں  کی جانے والی  وصیت دیگر  ورثاء کی اجازت پر موقوف ہوگی، اگر دیگر ورثاء بالغ ہوں اور انہوں نے اس وصیت کے نفاذ کی اجازت دے دی تو اسے نافذ کیا جائے گا، اور جس کے لیے وصیت کی گئی ہے اس کو وصیت کے علاوہ میراث میں سے شرعی حصہ بھی ملے گا۔ اور اگر بعض بالغ ورثاء وصیت کے نفاذ کی اجازت دے دیں تو ان کے حصے کے بقدر نافذ ہوگی، جب کہ نابالغ ورثاء کو ان کا حصہ پورا دیا جائے گا،اگر اجازت دیں تب بھی نابالغ کی اجازت کا اعتبار نہیں ہو گا، اور اگر ورثاء راضی نہ ہوں تو اس صورت میں وارث کو صرف اس کا بطورِ میراث متعین حصہ ملے گا، اس وصیت پر عمل نہیں کیا جائے گا۔

صورت مسئولہ میں جس بیٹی کے لیے والد نے پلاٹ خریدنے کی وصیت کی تھی تو یہ بیٹی ان پیسوں کی مالک نہیں بنی بلکہ یہ رقم بھی والد کے دیگر ترکہ کےساتھ تمام ورثاء میں تقسیم ہوگی البتہ اگر تمام ورثاء بالغ ہوں اور اپنی رضامندی سے والد کی اس وصیت کو پورا کرنا چاہیں تو اس وصیت پر عمل کرتے ہوئے والد کے ترکہ میں پہلے بیٹی کے لیے مکان یا پلاٹ خرید کر پھر ترکہ کو میراث کے اصول کے مطابق تقسیم کریں۔

ثم تصح الوصية لأجنبي من غير إجازة الورثة، كذا في التبيين و لاتجوز بما زاد على الثلث إلا أن يجيزه الورثة بعد موته وهم كبار ولا معتبر بإجازتهم في حال حياته، كذا في الهداية ... ولا تجوز الوصية للوارث عندنا إلا أن يجيزها الورثة۔ (الفتاوى الهندية، کتاب الوصایا وفیہ عشرۃ أبواب، ج:6، ص:90)

(ولا لوارثه وقاتله مباشرة) (إلا بإجازة ورثته) لقوله عليه الصلاة والسلام: «لا وصية لوارث إلا أن يجيزها الورثة» يعني عند وجود وارث آخر كما يفيده آخر الحديث وسنحققه (وهم كبار) عقلاء فلم تجز إجازة صغير ومجنون وإجازة المريض كابتداء وصية ولو أجاز البعض ورد البعض جاز على المجيز بقدر حصته." (رد المحتار علی الدرالمختار، کتاب الوصایا، ج:6، ص: 655/656)