واضح  رہے کہ سود ایسا جرم عظیم ہے جس کے کرنے والوں کے ساتھ اللہ تعالی اوراس کے رسول کی طرف سے جنگ کا اعلان ہے،چنانچہ  کسی فرد یا ادارے کے کاروبارکا انحصار اگرسود کی رقم  پرہوتو ان کا کاروبار شرعاً ناجائز ہے او راس سے حاصل ہونے والی آمدنی حلال نہیں،اور جوملازمین ان کے ساتھ کام کرتے ہیں تو اگران کا  کام حلال ہواور جائز عمل پراجرت لیتے ہوں توان کی آمدنی حلال ہے تاہم جتنا جلد ہوسکے شبہات سے پاک کوئی اورذریعہ آمدنی تلاش کرنا چاہیے ۔

صورت مسؤلہ کے مطابق اگرکسی نجی ادارے یا کمپنی کا انحصار سودی نظام پر ہویا سودی منافع  لیتے ہوں توان کی آمدنی حلال نہیں ،جہاں تک ان کے ملازمین کی  تنخواہ کی بات ہے توچونکہ ملازمین اپنےعمل کے عوض  تنخواہ لیتے ہیں تواگران کا عمل  جائزاور حلال ہوتوان کی تنخواہ بھی حلال ہے  لیکن جتنا جلد ہوسکے کوئی اور ذریعہ آمدنی تلاش کریں تاکہ آمدنی شبہات سے بالکل پاک رہے لیکن اگر ان کاعمل ناجائزہو مثلاً سودی معاملہ کے لکھنے، گواہ بننے، مفاہمت کرنے اور تعاون میں شریک ہوں توان کی آمدنی حلال نہیں، دوسری حلال ذریعہ آمدنی تلاش کرنے کے بعد جتنی رقم حرام مال میں سے لی ہواتنی مقدار کواپنے وسعت کے بقدرصدقہ کرے۔

قال الله تعالى: ﴿وَأَحَلَّ اللَّهُ الْبَيْعَ وَحَرَّمَ الرِّبَا ﴾ [البقرة: 275] 

﴿فَإِنْ لَمْ تَفْعَلُوا فَأْذَنُوا بِحَرْبٍ مِنَ اللَّهِ وَرَسُولِهِ وَإِنْ تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَ﴾ [البقرة: 279] 

حدثنا أحمد بن يونس، حدثنا زهير، حدثنا سماك، حدثني عبد الرحمن بن عبد الله بن مسعود

عن أبيه، قال: لعن رسول الله صلى الله عليه وسلم آكل الربا وموكله وشاهده وكاتبه.(سنن أبي داود،باب في آكل الرباوموكله،ج:5،ص:222،رقم الحدیث:3333)

وإذا مات الرجل وكسبه خبيث فالأولى لورثته أن يردوا المال إلى أربابه فإن لم يعرفوا أربابه تصدقوا به. (الفتاوى الهندية، کتاب الکراهية، الباب الخامس عشر في الکسب، ج:5، ص:349)