واضح رہے کہ زکوٰۃ کا مال وکیل کے پاس امانت ہوتا ہے اس لئے مناسب نہیں کہ وکیل اس میں ایسا تصرف کرے جس میں خیانت کا شبہ پایا جائے اور جو تصرف ایسا ہو جس سے زکوٰۃ میں دی ہوئی چیز پر کوئی اثر نہ پڑتا ہو تو اس میں کوئی حرج نہیں ۔

صورت مسئولہ کے مطابق اگر موکل نے وکیل کو کسی خاص شخص کو زکوٰۃ دینے کا نہ کہا ہو تو وکیل اپنی اولاد اور بیوی کو زکوٰۃ کی رقم دے سکتا ہے ،اس شرط کے ساتھ کہ بیوی اور اولاد زکوٰۃ لینے کے مستحق ہوں۔ اسی طرح وکیل اگر غریب ہو تو وہ زکوٰۃ کی رقم خود استعمال نہیں کر سکتا ۔ تاہم اگر موکل نے وکیل کو اختیار دیا ہو اور یہ کہہ دیا ہو کہ"جو چاہے کرو یا جسے چاہو دو یا جہاں چاہو اس کو خرچ کرو "تو اس صورت میں اگر وکیل زکوٰۃ کا مستحق ہو تو اپنے استعمال میں لا سکتا ہے۔

وللوكيل أن يدفع لولده الفقير وزوجته لا لنفسه إلا إذا قال ربها: ضعها حيث شئت۔(ردالمحتار على الدرالمختار،كتاب الزكاة،ج:2،ص:269)

وللوكيل بدفع الزكاة أن يدفعها إلى ولد نفسه كبيرا كان أو صغيرا، وإلى امرأته إذا كانوا محاويج، ولا يجوز أن يمسك لنفسه شيئا اهـ.إلا إذا قال ضعها حيث شئت فله أن يمسكها لنفسه كذا في الولوالجية۔(البحر الرائق، كتاب الزكاة،ج:2،ص:227)