واضح رہے کہ اگر کوئی شخص کسی دوسرے کو کوئی چیز فروخت کرے اور ثمن کسی ایک کرنسی میں متعین کیا جائے، پھر بائع اپنی رضامندی سے ثمن دوسری کرنسی میں وصول کرلے، اس کے بعد مبیع میں کوئی مستحق نکل آئے ، تو ایسی صورت میں اگر دونوں فریق باہمی رضامندی سے اسی ادا کردہ کرنسی کی واپسی پر متفق ہوجائیں تو صحيح، ورنہ شرعاً بائع پر وہی کرنسی واپس کرنا لازم ہوگا جس کرنسی میں عقدِ بیع منعقد ہوا تھا۔

لہٰذا صورتِ مسئولہ اگر واقعتاً زمین کی بیع نو لاکھ پاکستانی روپے کے عوض ہوئی تھی، لیکن مشتری نے تیس ہزار درہم بھیجے جو بائع نو لاکھ روپے کے بدلے میں وصول کیے بعد میں زمین میں کوئی اور مستحق نکل آیا تو شرعاً بائع پر نو لاکھ پاکستانی روپے (جس پر عقدِ بیع ہوا تھا)، واپس کرنا لازم ہوں گے لہذا اس سے تیس ہزار درہم کا مطالبہ جائز نہیں۔

استفيد من التعريف أن المعتبر ما وقع عليه العقد الأول دون ما وقع عوضا عنه، فلو اشترى بعشرة دراهم فدفع عنها دينارا أو ثوبا قيمته عشرة أو أقل أو أكثر فرأس المال العشرة لا الدينار والثوب؛ لأن وجوبه بعقد آخر وهو الاستبدال. (رد المحتار على الدر المختار،كتاب البيوع،باب المرابحة و التولية، ج:5، ص:134)