اگرکوئی شخص نذر کو کسی شرط کے ساتھ معلق کرے، اور بعد میں وہ شرط پوری ہو جائے، تو اس نذر کو پورا کرنا شرعاً واجب ہو جاتا ہے۔ البتہ اگر نذرمیں کسی متعین چیز کو صدقہ کرنے کا وعدہ کیا گیا ہو، تو اس چیز کو بعینہٖ دینے کی بجائے اس کی مالیت (قیمت) مستحقینِ زکوٰۃ کو ادا کرنا بھی جائز ہے۔

لہٰذا صورتِ مسئولہ میں اگر سائلہ نے یہ نذر مانی ہو کہ" اگر میرا بیٹا کینسر کی بیماری سے صحت یاب ہو گیا، تو میں اپنی سونے کی دو انگوٹھیاں صدقہ کروں گی"اورپھربیٹا صحت یاب ہو گیا، تو سائلہ پر نذر پوری کرنا لازم ہے۔ چنانچہ وہ یا تو وہی متعین سونے کی دو انگوٹھیاں صدقہ کر دے، یا ان کی موجودہ قیمت کے برابررقم مستحقینِ زکوٰۃ کو ادا کر دے، دونوں صورتوں میں نذر ادا ہو جائے گی۔

 (ووجد الشرط) المعلق به (لزم الناذر) لحديث من نذر وسمى فعليه الوفاء بما سمى (كصوم وصلاة وصدقة).(الدر المختار شرح تنوير الأبصار، كتاب الأيمان، ص:284)

 (نذرأن يتصدق بعشرة دراهم من الخبز فتصدق بغيره جاز إن ساوى العشرة) كتصدقه بثمنه.(الدر المختار، كتاب الأيمان، ص:285)