واضح رہے کہ  کرنسی کے عوض سونا یا چاندی خریدنا شرعا جائز ہے، تاہم اس میں ضروری ہے کہ عقد کے وقت کم از کم ایک جانب سے قبضہ پایا جائے، یعنی یا سونا فوراً حوالے کیا جائے یا رقم مجلسِ عقد میں ادا کی جائے۔ اگر دونوں چیزیں مؤخر ہوں، یعنی نہ رقم مجلس عقد میں مکمل طور پر دی گئی ہو اور نہ سونا قبضے میں دیا گیا ہو، تو یہ معاملہ شرعاً درست نہیں ہوتا۔

صورتِ مسئولہ میں چونکہ بکر رقم قسطوں میں جمع کرائے گا اور زید بھی سونا بعد میں دے گا، اس لیے عقد کے وقت کسی ایک بدل پر بھی مکمل قبضہ موجود نہیں۔ لہٰذا یہ معاملہ “بیع الکالی بالکالی” (ادھار کے بدلے ادھار) کے زمرے میں آتا ہے، جو ناجائز ہے۔

البتہ اس کی جائز صورت یہ ہے کہ فی الحال کوئی سودا نہ کریں اور بکر جو رقم ادا کرتا ہے وہ زید کے پاس امانت یا اس کے ذمے قرض ہو اور ایک مخصوص مدت کے بعد جو کچھ رقم اکھٹی ہو جائے تو پھر باہم رضامندی سے سونے کی خرید و فروخت کا عقد کر لیا جائے۔

وإذا اشترى الرجل فلوسا بدراهم ونقد الثمن، ولم تكن الفلوس عند البائع فالبيع جائز؛ لأن الفلوس الرائجة ثمن كالنقود، وقد بينا أن حكم العقد في الثمن وجوبها ووجودها معا، ولا يشترط قيامها في ملك بائعها لصحة العقد كما يشترط ذلك في الدراهم والدنانير.(المبسوط للسرخسي،كتاب الصرف،باب البيع بالفلوس،ج:14،ص:24)