واضح رہے کہ نکاح  کو ختم کرنا ازدواجی تعلقات میں درپیش ناچاقی کا ابتدائی حل نہیں  بلکہ اصلاح ِحال سے مایوسی کے بعدآخری مرحلہ ہے لہذا چاہیےکہ  باہمی مفاہمت سے ازدواجی تعلق کو  برقرار رکھنے کی  بارآورکوشش کی جائے ۔تاہم کشیدگی کی وجہ سے اگر نکاح  برقرار رکھنا  مشکل ہو تو شریعت ِمطہرہ خاوند کو یہ اجازت دیتی ہے کہ وہ اپنی بیوی کو سنت طریقے کے مطابق طلاق دے کر نکاح ختم کرے ۔ اِس صورت میں اگر مہر مقرر ہوچکاہو لیکن رُخصتی نہ ہوئی ہو تو عورت آدھے مہر کاحقدار ہوگی۔

 صورت ِمسؤلہ میں اگر باہمی مفاہمت کے بعدبھی رشتہ ازدواجی قائم رکھنا مشکل ہو، اور نکاح کے بعد رخصتی اور خلوت ِصحیحہ نہ ہوئی ہوتو اگر اس لڑکے کی طرف سے اپنی منکوحہ کو طلاق ملے تو جتنا مہر مقرر ہو چکا ہے اس کا آدھا حصہ اس لڑکی  کا حق بنے گا، ہاں اگر لڑکے والے اپنی رضامندی سے لڑکی کو پورا مہر دے دیں یا لڑکی اور اُس کے خاندان والے اپنا آدھا مہر بھی معاف کردیں تو یہ طرفین کی طرف سے ایک مستحسن فیصلہ شمار ہوگا جس کی شریعت حوصلہ افزائی کرتی ہے۔

قال اللہ تعالی : وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِنْ أَهْلِهِ وَحَكَمًا مِنْ أَهْلِهَا إِنْ يُرِيدَا إِصْلَاحًا يُوَفِّقِ اللَّهُ بَيْنَهُمَا إِنَّ اللَّهَ كَانَ عَلِيمًا خَبِيرًا (النساء:35)

وقال تعالی : وَإِنْ طَلَّقْتُمُوهُنَّ مِنْ قَبْلِ أَنْ تَمَسُّوهُنَّ وَقَدْ فَرَضْتُمْ لَهُنَّ فَرِيضَةً فَنِصْفُ مَا فَرَضْتُمْ إِلَّا أَنْ يَعْفُونَ أَوْ يَعْفُوَ الَّذِي بِيَدِهِ عُقْدَةُ النِّكَاحِ ۔(البقرۃ:237)

أما تفسيره شرعا فهو رفع قيد النكاح حالا أو مآلا بلفظ مخصوص۔۔۔ فالأحسن أن يطلق امرأته واحدة۔ (الفتاوى الهندية، كتاب الطلاق، الباب الأول، ج:1،ص:415)

یجب(نصفہ بطلاق قبل وطئ،أو خلوة)۔ (الدر المختار، كتاب النكاح، باب المهر، ج:4،ص:235)