واضح رہے کہ میاں بیوی کے ازدواجی تعلقات قائم ہونے کے بعد اگر شوہر باوجود قدرت کے بیوی کے حقوق اور نان نفقہ کی ادائیگی سے انکار کرے جس کی وجہ سے عورت کے لیے خاوند کے ساتھ زندگی گزارنا مشکل ہو جائے  تو ایسی صورت میں اصل حکم تو یہ ہے کہ عورت شوہر کو طلاق یا خلع پر راضی کر کے اس سے چھٹکارا حاصل کرے تاہم اگر شوہر نہ حقوق ادا کر رہا ہو اور نہ ہی طلاق یا خلع پر راضی ہوتا ہو تو ایسی صورت میں یہ شوہر متعنت کہلاتا ہے،  اور متعنت کی بیوی کو مسلمان حاکم يا عدالت کی طرف رجوع کرنے کا حق حاصل ہے ، بشرطیکہ عورت عزت و آبرو کا لحاظ رکھتے ہوئے کسب معاش پر قدرت نہ رکھتی ہو، یا نفقہ کی قدرت توہو، لیکن شوہر سے علیحدہ رہنے کی صورت میں گناہ میں مبتلا ہونے کا خدشہ ہو ، تو  ایسی صورت میں عدالت مکمل تحقیق کرے اگر عورت شوہر کے ظلم وستم کو ثابت کرے تو عدالت شوہر کو حکم دے کہ یا تو بیوی کو صحیح طریقے سے آباد کرے یا طلاق دے دے۔ اگر وہ صحیح طریقے سے بیوی کو اپنے پاس رکھنے پر آمادہ ہو جائے تو ٹھیک اور اگر انکار کرے یا عدالت کا نوٹس اور سمن ملنے کے باوجود عدالت میں شوہر یا اس کا وکیل حاضر نہ ہو اور بیوی بہر صورت اس کی زوجیت سے نكلنا چاہتی ہو تو تب عدالت عورت کو تنسیخ نکاح کی ڈگری دے سکتی ہے ، اور یہ تنسیخ شرعاًمعتبر ہوگی اور عدت گزرنے کے بعد یہ عورت دوسری جگہ نکا ح کر سکتی ہے۔

صورتِ مسئولہ کے مطابق اگر مذکورہ عورت کی طرف سے عدالت میں دائر کردہ درخواست اور عدالتی فیصلہ میں ذکر شده تفصیلات حقیقت پر مبنی ہوں یعنی واقعی شوہر اس پر ظلم  کرتا رہا ہو اور نان نفقہ بھی نہیں دیتا ہو ۔ نیز نوٹس ملنے کے باوجود  بغیر عذر  کے عدالت میں کیس کی پیروی نہ کی ہو تو ایسی صورت میں عدالت کا فسخِ  نکاح کا فیصلہ شرعاً معتبر ہےاور یہ عورت دوسری جگہ شادی کرسکتی ہے۔

وأماالمتعنت الممتنع عن الإنفاق،ففي مجموع الأميرمانصه:إن منعهانفقةالحال،فلها القيام،فإن لم يثبت عسره أنفق،أوطلق،وإلاطلق عليه قال محشيه:(وإلاطلق)أي عليه الحاكم من غيرتلوم.(الحيلة الناجزة، ص:133)