رشوت دے کراپنا مقصد حاصل کرنا سخت گناہ ہے اس لئے رشوت دینے اور لینے سے اپنے آپ کو بچانا ہر مسلمان کے لئے نہایت ضروری ہے،تاہم اگر کوئی شخص کسی عہدے یا چیز کا حقدار ہو اور رشوت کے بغیر اس کی وصولی ناممکن ہو توفقہاےکرام کے ہاں ایسی حالت میں رشوت دے کر اپنے حق کو حاصل کرنے کی گنجائش ہے، البتہ رشوت لینے والے کے لیے یہ رقم لینا بہر حال ناجائز اور حرام ہے۔

صورت مسئولہ میں کسی اچھی جگہ پر ڈیوٹی کرنا عام طور پر ملازم کا حق نہیں ہوتابلکہ ملازم سے ملازمت ملتے وقت اس بات کا عہد لیا جاتا ہے کہ آپ کا تبادلہ کسی بھی جگہ ہوسکتا ہے اس لئے ایسی صورت میں کسی اچھی جگہ پر تبادلہ کرنے کے لئے کلرک کے واسطے افسران بالا کو کچھ رقم وغیرہ دینا رشوت کے زمرے میں آئے گا جو لینے والے اور دینے والے دونوں کے لئےناجائز ہے ۔

عن عبد الله بن عمرو، قال: قال رسول الله صلى الله عليه وسلم: لعنة ‌الله ‌على ‌الراشي والمرتشي.(سنن ابن ماجۃ، کتاب الأحکام، باب التغلیظ في الحیف و الرشوۃ ، ج:2، ص:775)

ومنها إذا دفع الرشوة خوفا على نفسه أو ماله فهو حرام على الآخذ غير حرام على الدافع. (البحر الرائق شرح كنز الدقائق،كتاب القضاء،ج:6، ص:441)