واضح رہے کہ موجودہ  دورمیں ہرملک کی کرنسی کو ثمن عرفی کی حیثیت حاصل ہے، چنانچہ اتنی مالیت کی کرنسی جس کے پاس ہو کہ جس سے سونے یا چاندی میں سے کسی ایک کابھی نصاب خریداجا سکے، تو وہ شخص صاحب نصاب شمارہوگا،اور فقہاء کرام کے ہاں اس پر زکوۃ و قربانی واجب ہوگی۔ عصر حاضر میں صورتحال یہ ہے کہ سونے چاندی کی مالیت میں کافی تفاوت آیا ہے، لیکن فقہاءکرام کی تصریحات کے مطابق زکوۃ میں جو انفع للفقراء ہواس کا اعتبار ہوتا ہے،چونکہ موجودہ دور میں چاندی کا نصاب سونے کے مقابلے میں بہت کم قیمت کا ہوتا ہے،اس لیے کرنسی(ثمن عرفی) میں نصاب کا موازنہ چاندی کی قیمت کے ساتھ کرنے میں فقراء کا نفع ہے۔

 اگر سونے کو نصاب بنایا جائے،تو یہ احتیاط کے منافی ہوگا کیونکہ بے شمار لوگ ایسے ہوں گے جو چاندی کے نصاب کے اعتبارسے صاحب نصاب ہوں گے  لیکن سونے کے نصاب کے اعتبار سےصاحب نصاب نہ ہوں گے،چنانچہ وہ زکوۃ ادا نہیں کریں گے، بلکہ زکوۃ وصول کریں گے،حالانکہ وہ ایک نصاب کے مالک بھی ہوں گے، چونکہ عبادات میں احتیاط کا پہلو راجح ہوتا ہے اس لیے چاندی کے نصاب پر فتوی دیا جاتا ہے، نیز چاندی کا نصاب  انفع للفقراء بھی ہے، اس لیے بھی اس پر فتوی راجح ہے،اور اس میں کوئی حرج یا مشقت اس لیے  نہیں کہ صاحب نصاب کے پاس جتنا مال ہوگا،اسی تناسب سے اس پرزکوۃ لازم ہوگی،اگر مال کم ہو توزکوۃ بھی کم ہوگی اگر مال زیادہ ہو توزکوۃ بھی زیادہ ہوگی۔

الزكاة واجبة في عروض التجارة كائنة ما كانت إذا بلغت قيمتها نصابا من الورق أو الذهب.(الهداية في شرح بداية المبتدي،ج:1،ص:103)

ألا تری أنه لوکان بالتقویم بأحدھما یتم النصاب وبالآخر لا فإنه یقوم بما یتم به النصاب نظراً للفقراء واحتیاطاً.(البدائع الصنائع في معرفة الشرائع،ج:2،ص:417)

ولو ضم أحد النصابين إلى الأخرى حتى يؤدي كله من الذهب أو من الفضة لا بأس به لكن يجب أن يكون التقويم بما هو أنفع للفقراء قدرا ورواجا  (الفتاوی الہندية‏‏‏،۔ کتاب الزکوۃ،۔ الباب الثالث فی زکوۃ الذہب والفضة۔،الفصل الاول،۔ ج:1۔ ص:241)

أن التقويم إنما يكون بالمسكوك عملا بالعرف (مقوما بأحدهما) إن استويا، فلو أحدهما أروج تعين التقويم به؛ ولو بلغ بأحدهما نصابا دون الآخر تعين ما يبلغ به، ولو بلغ بأحدهما نصابا وخمسا وبالآخر أقل قومه بالأنفع للفقير(ردالمحتار علی الدرالمختار،۔ کتاب الزکوۃ،۔ باب زکوۃ المال۔، ج:3۔ ص:228)