جس ملازم کو متعین وقت کے عوض  متعین اجرت ملتی ہو،وہ اجیر خاص کہلاتا  ہے اور اجیر خاص کو مقررہ وقت میں اپنے مالک کی طرف سے سپرد کردہ کام کے علاوہ دوسرا کام  کرنے کی گنجائش نہیں،چنانچہ اگروہ  کام کے مقررہ وقت میں کسی دوسرے کےلیے کام کرے،تو جتنا وقت غیر متعلقہ  کام  پر صرف کیا ہےاس کے بقدر اس کی تنخواہ سے کٹوتی کرناجائزہے۔

صورت مسؤلہ کے مطابق  تنخواہ دار سیلزمین کا کمپنی کی طرف سے مقررہ وقت میں دوسری کمپنی کی مصنوعات فروخت کرناجائز نہیں،نیز اس جرم پر اگر کمپنی سیلزمین کو ملازمت سے برطرف کرتی ہےتو شرعااس کی گنجائش ہے،اور اگراس کی ماہانہ تنخواہ سے کٹوتی کرتی ہے تواگر دوسری کمپنی کے لیے  کئے گئے کام  کا وقت معلوم ہوتواسی کے بقدر کٹوتی جائز ہے تاہم اگراس وقت اور کام کی مقدار معلوم نہ ہو اور کمپنی نے سیلزمین  کے ساتھ  پہلے سے معاہدہ بھی کیا ہو کہ اس جرم پر 40 فیصد کٹوتی ہوگی،تو معاہدے کے مطابق سیلزمین سے 40 فیصد تنخواہ کی کٹوتی  کی گنجائش ہے۔

(والثاني) وهو الأجير (الخاص) ويسمى أجير وحد (وهو من يعمل لواحد عملا مؤقتا بالتخصيص ويستحق الأجر بتسليم نفسه في المدة وإن لم يعمل كمن استؤجر شهرا للخدمة أو) شهرا (لرعي الغنم)(ردالمحتارعلی الدرالمختار،کتاب الأجارۃ،مبحث الأجیرالخاص،ج:6،ص:69)

 وليس للخاص أن يعمل لغيره، ولو عمل نقص من أجرته بقدر ما عمل فتاوى النوازل.(ردالمحتارعلی الدر المختار،کتاب الأجارۃ،مبحث الأجیر الخاص،ج:6،ص:70)

وقال النبي صلى الله عليه وسلم المسلمون ‌عند ‌شروطهم(صحیح البخاري،كتاب الأجارة،باب أجر السمسرة،ج:3،ص:96)