سیلزمین کی شرعی حیثیت اجیر خاص کی ہے اوراجیرخاص کے ہاتھ مالک کا مال امانت ہوتاہےلہذا اگرسیلزمین کے ہاتھ سے کوئی چیزبغیر کسی کوتاہی اور لاپروائی کے ضائع ہوجائے تواس کا ضمان سیلزمین پرلازم نہیں ہو تا،البتہ اگرسیلزمین کی کسی ایسی حرکت سے وہ چیزضائع ہوجائے جس کی مالک نے نہ صراحۃً اجازت دی ہو،اور نہ دلالۃً یا سیلزمین کی کوتاہی اور لاپروائی کی وجہ سے  کوئی  چیزضائع ہوجائے تواس میں ضمان سیلزمین  پر آئے گا۔

صورت مسؤلہ کے مطابق اگر سیلزمین مارکیٹ میں ایسے گاہکوں کو قسطوں پر مال دے رہا ہو،جن پرمارکیٹ میں اعتماد ہو،،نیز ان کی ظاہری حالت سے بھی وہ  درست معلوم ہوتے ہوں،اور اس جیسے گاہکوں کے لیے مالک کی طرف سے قسطوں  پرمال دینے کی صراحۃً یا دلالۃً اجازت موجود ہو،توایسے گاہکوں کو اگر سیلزمین قسط پر مال دے اور بعد میں وہ گاہک کسی وجہ سے غائب ہوجائے توا س صورت میں سیلزمین کو ذمہ دار ٹھہرانا جائزنہیں،تاہم اگر سیلزمین غفلت  وکوتا ہی سے ایسے گاہک کو قسطوں پرمال دے،جو قابل اعتماد نہ ہواور مالک کی طرف سے ان گاہکوں کو قسطوں پر مال دینے کی اجازت بھی نہ ہو توایسی صورت میں اگر وہ گاہک غائب ہوجائےتو کمپنی سیلزمین کی تنخواہ سے اس نقصان کی تلافی کرسکتی ہے۔        

(‌والخاص ‌يستحق ‌الأجر ‌بتسليم ‌نفسه ‌في ‌المدة، وإن لم يعمل كمن استؤجر شهرا للخدمة أو لرعي الغنم) أي الأجير الخاص يستحق الأجرة بتسليم نفسه للعمل عمل أو لم يعمل۔(تبیین الحقائق،باب ضمان الاجیر،ج:5،ص:137)

لو تلف المستأجر فيه بتعدي الأجير أو تقصيره يضمن.(مجلة الأحكام العدلية،كتاب الأجارات،فصل ثالث،فی ضمان الأجیر۔مادہ رقم:607،ج:2،ص:113)

تعدي الأجير هو أن يعمل عملا أو يتحرك حركة مخالفتين لأمر الآجر صراحة أو دلالة.(مجلة الأحكام العدلية،ج:2،ص:113)