واضح رہے کہ خرید و فروخت کے معاملات میں شرط یہ ہے کہ جن اشیاء کی خرید وفروخت  ہو رہی ہو معاملہ طے پاتے وقت ان کا وجود قطعی ویقینی ہو اور ان کی معدومیت (ناپیدگی) کا کوئی شائبہ نہ ہو، اسی طرح مبیع معلوم و متعین ہواور مبیع  آگے فروخت کرنے سے پہلے اس  کو باقاعدہ   قبض کر کے اپنے ضمان اور تحویل میں لیا جائے اور اگر خریدی ہوئی چیز مشاع (مشترک غیر منقسم) ہو تو اس میں باقاعدہ افراز  ہو ، نیز یہ کہ مختلف ممالک کی کرنسیوں کے باہمی تبادلہ  میں شرط یہ ہے کہ مجلس عقد میں احد البدلین(دونوں میں سے ایک) پر قبضہ ہو جائے چنانچہ دونوں میں  سے کسی ایک پر بھی اگر قبضہ نہ ہو تو  بیع ناجائز ہوگی۔

 فاریکس ٹریڈنگ میں شرعی لحاظ سے درج ذیل  قباحتیں پائی جاتی ہیں  :

(1)اس میں جن اشیاء کی خرید و فروخت ہوتی ہے ان کا وجود قطعی اور یقینی نہیں ہوتا، خریدار جو چیز خریدتا ہے اسے کوئی علم نہیں ہوتا کہ وہ چیز حقیقت میں بائع (فروخت کنندہ )کے پاس موجود ہے یا نہیں اگر موجود ہے تو کہاں اور کتنی مقدار میں موجود ہے چونکہ خریدار کا مقصد اشیاء خریدنا نہیں ہوتا بلکہ   ریٹ کے اُتار چڑھاؤ سے ہونے والے نفع کا حصول ہوتا ہے اس لئے خریدار اشیاء کے موجود ہونے کی ضرورت محسوس نہیں کرتا جبکہ شرعاً ان کاموجود ہونا ضروری ہےلہذا فاریکس ٹریڈنگ کے ذریعہ کیے جانے والے معاملات میں مبیع معدوم کا قوی امکان پایا جاتا ہے۔

(2)مالی معاملات میں جہاں کہیں اشیاء یا خدمات کا حقیقی وجود نہ ہو اور محض کسی فرضی چیز کی بنیاد پر سرمایہ کاری کی جائے تو یہ قمار (سٹہ) کے حکم میں داخل ہو کر ناجائز ٹھہرتا ہے اسی طرح جس معاملہ میں نفع و نقصان کا مدار کسی موہوم اور متردد واقعہ پر ہو وہ بھی قمار میں داخل ہے۔ Forex کا بھی یہی معاملہ ہے کہ یہاں کسی غیر یقینی اور فرضی مبیع کا نام لے کر سرمایہ کاری کی جاتی ہے اور نفع و نقصان کا مدار قیمتوں کے اُتار چڑھاؤ  پر ہوتا ہے جو ایک موہوم اور متردد صورتحال ہے اس لیے اس کاروبار میں  قمار کابھی قوی امکان  ہے جو نص صریح سے حرام ہے۔

(3) Forexٹریڈنگ میں  عموما مبیع موجود نہیں ہوتا تاہم اگر ایسی چیز خریدی جائے جس کا حقیقی وجود ہو تو خریدار کا آگے فروخت کرنے سے پہلے اس پر قبضہ ضروری ہے اور چونکہ اس مبیع کا بائع کی ملکیت میں آنا مشکل ہے کیو نکہ عموما لوگ بیع و شراء صرف قیمتوں کے اُتار چڑھاؤ  کے ذریعہ نفع اٹھانے کے لیے کرتےہیں ان کا مقصد مبیع کا حصول نہیں ہوتا اسی وجہ سے بغیر قبضہ کیے آگے فروخت کردیتے ہیں لہذا یہ بیع قبل القبض کی قباحت سے بھی خالی نہیں اور بیع قبل القبض ناجائز ہے۔

 (4)مختلف ممالک کی کرنسیوں کے باہم تبادلہ کے وقت مجلس عقد میں احد البدلین (دونوں میں سے ایک) پر قبضہ ضروری ہے ورنہ عقد "بیع الکالی بالکالی" کے زمرہ میں داخل ہو کر ناجائز ہوتا ہے، Forexٹریڈنگ میں  جب کرنسی خریدی جاتی ہے تو کسی جانب سے بھی پورا قبضہ نہیں ہوتا اس لیے یہ بھی ناجائز ہے۔

الغرض: Forex ٹریڈنگ کے ذریعہ  کاروبار قمار (سٹہ)، بیع المعدوم(غیر موجود شئی کی بیع)، بیع قبل القبض (قبضہ سے پہلےمبیع آگے فروخت کرنا) اور بیع الکالی بالکالی(قرض کا قرض کے بدلے بیع)پر مشتمل ہونے کی وجہ سے حرام ہے  اور اس میں سرمایہ کاری شرعا جائز نہیں اس لیے مسلمانوں پر اس سے بچنا لازم اور ضروری ہے۔

قال الله تعالى: يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ۔(المائدۃ:5/90)

يقول تعالى: ناهيا عباده المؤمنين عن تعاطي الخمر والميسر وهو القمار... قال: الميسر هو القمار. ‌وقال ‌الضحاك، ‌عن ‌ابن ‌عباس، ‌قال: الميسر هو القمار، كانوا يتقامرون في الجاهلية إلى مجيء الإسلام، فنهاهم الله عن هذه الأخلاق القبيحة.(تفسير ابن كثير، آیة:9093/، ج:2، ص:126/127)

وعن ابن عمر: أن النبي صلى الله عليه وسلم نهى عن ‌بيع ‌الكالئ بالكالئ۔(مشکاۃ المصابیح،باب المنھي عنھا من البیوع،الفصل الثاني،رقم الحدیث:2863)

(ومنها) أن يكون مقبوضا في مجلس السلم لأن المسلم فيه دين والإفتراق لا عن قبض رأس المال يكون افتراقا عن دين بدين، وإنه منهي عنه، لما روي أن رسول الله صلى الله عليه وسلم «نهى عن ‌بيع ‌الكالئ بالكالئ» أي النسيئة بالنسيئة،(بدائع الصنائع،كتاب البيوع،فصل في شرائط الركن،ج:5،ص:202)

وأما الذي يرجع إلى المعقود عليه فأنواع (منها): أن يكون موجودا فلا ينعقد ‌بيع ‌المعدوم،(بدائع الصنائع،کتاب البیوع،فصل فی الشرط الذی یرجع الی المعقود علیہ،ج:5،ص:138)

وإذا عرفت المبيع والثمن فنقول ‌من ‌حكم ‌المبيع إذا كان منقولا أن لا يجوز بيعه قبل القبض،(الفتاوى الهندية،الفصل الثالث في معرفة المبيع والثمن،كتاب البيوع،ج:3،ص:1)