واضح رہے کہ اگر کوئی شخص کسی مخصوص فرد، کمپنی یا ادارے کی طرف سے کسی مقررہ وقت یا معیّن مدت کے لیے کام پر مامور نہ ہو، بلکہ عام لوگوں کو اجرت کے عوض اپنی خدمات فراہم کر رہا ہو، تو ایسے شخص کو "اجیرِ مشترک" یا "اجیرِ عام" کہا جاتا ہے، اور اس کے لیے اپنی خدمات کے بدلے اجرت متعین کرکے لینا شرعاً جائز ہے۔

صورتِ مسؤلہ میں، اگر ایزی پیسہ ریٹیلر کسٹمر کی رقم ایزی پیسہ کے ماسٹر اکاؤنٹ (جو مخصوص طور پر دکانداروں کے لیے کھولا جاتا ہے) کی بجائے اپنے ذاتی اکاؤنٹ میں منتقل کرکے  کسٹمر کو نقد رقم دیتا ہے، یا اس کی طرف سے کسی کو رقم بھیجتا ہے،اور اس سہولت کے عوض اضافی رقم لیتا ہے،اور قانون کی رو سے اس کی اجازت ہو،تو یہ اضافی رقم لینا اس کے لیےجائز ہے، بشرطیکہ کسٹمرکو اس اجرت کے متعلق  پہلے سے آگاہ کیا ہو،تاکہ بعد میں باہم نزاع پیدا نہ  ہو۔

(الأجراء على ضربين: مشترك، وخاص.فالأول من يعمل لا لواحد) كالخياط ونحوه (أو يعمل له عملا غير موقت) كأن استأجره للخياطة في بيته غير مقيدة بمدة كان أجيرا مشتركا وإن لم يعمل لغيره (أو موقتا بلا تخصيص) كأن استأجره ليرعى غنمه شهرا بدرهم كان مشتركا، إلا أن يقول: ولا ترعى غنم غيري، وسيتضح…(ولا يستحق المشترك الأجر حتى يعمل كالقصار ونحوه). (الدر المختار شرح تنويرالأبصار، کتاب الإجارة، باب ضمان الأجير،ج:9،ص:87-88)