عموما مساجد میں عوام سے جو چندہ  جمع کیا جاتا ہے وہ مسجد کے مصالح ہی کے لیے ہوتا ہے لہذا اس کو مسجد کی ضروریات ومصارف میں خرچ کرنا ضروری ہے اور اس کو مدرسہ میں صرف کرنا درست نہیں۔ البتہ اگر چندہ دہندگان کی طرف سے اس چندہ کو مدرسہ میں استعمال کرنے کی اجازت ملی ہو، یا چندہ مسجد اور مدرسہ دونوں کے لیے جمع کیا گیا ہو تو تب یہ چندہ مسجد کے ساتھ خاص نہ ہوگا بلکہ مسجد ومدرسہ دونوں کی ضروریات میں خرچ کرنے کی گنجائش ہوگی لیکن جب تک ان سے اجازت نہ لی گئی ہو تو چونکہ عرف یہی ہے کہ بلا تعین چندہ صرف مسجد کے مصالح کے لیے جمع کیا جاتا ہے لہذا اس چندہ کو مدرسہ میں استعمال کرنے سے اجتناب ضروری ہے۔نیزجس مسجد سے مدرسہ ملحق ہو اور دونوں ایک نظام کے تحت چلتے ہوں ،اور چندہ دینے  والے جانتے ہوں کہ ہمارا چندہ ان دونوں میں مشترکہ طور پر خرچ کیا جاتا ہے تو پھر اس میں سے  امام اور مدرس کو تنخواہ دینا جائز ہے۔

"الوکیل انما یستفید التصرف من الموکل وقد امرہ بالدفع الی غیرہ کما لو اوصی لزید بکذا لیس للوصی الدفع الی غیرہ فتامل" (ردالمحتار علی الدرالمختار کتاب الزکوۃ ج3 ص189)

(ويبدأ من غلته بعمارته) ثم ما هو أقرب لعمارته كإمام مسجد ومدرس مدرسة يعطون بقدر كفايتهم، ثم السراج والبساط كذلك إلى آخر المصالح. (رد المحتار على الدر المختار، كتاب الوقف، مطلب في وقف المنقول قصدا، ج:4، ص:365)