میاں بیوی کے مابین ازدواجی تعلق قائم ہونے کے بعد اگر میاں اپنی بیوی کے حقوق ادا نہ کرے یا اُس پر ظلم و ستم کرے  تو اس صورت میں بیوی کو اس بات کا حق حاصل ہے کہ وہ شوہر سےطلاق یا خلع  لے کر چھٹکارا حاصل کرے،اگر شوہر بیوی کو نہ ہی طلاق  یا خلع دے،اور نہ ہی اس کے حقوق ادا کرے بلکہ اس پر ظلم و ستم کرے تو اس صورت میں  یہ شوہر متعنت شمار ہو گا اور متعنت کی بیوی کو مسلمان حاکم یا  عدالت کی طرف رجوع کرنے کا اختیار حاصل ہے، اور عدالت میں اگر بیوی  شوہر کے ظلم وستم  کو ثابت کرےتو عدالت شوہر کو  حکم دے گی کہ بیوی کو صحیح طریقے سے رکھو یا اسے طلاق دے دو،اگر شوہر کسی ایک بات پر بھی آمادہ نہ ہو ا،یا عدالت کا نوٹس ملنے کے باوجود بغیر کسی عذر کے شوہر خود یا اس کا کوئی وکیل عدالت میں  حاضر نہ ہوتو ایسی صورت میں اگر بیوی زوجیت سے نکلنا چاہتی ہے اور عدالت فسخ نکاح کی ڈگری دے تو اس سے بیوی  کو طلاق بائن واقع ہو جائے گی  ،اور عدت کے بعد دوسری جگہ بیوی کو نکاح کرنے کا حق حاصل ہو گا لیکن اگر شوہر یا اس کا وکیل عدالت میں حاضر ہو کر  بیان دے کہ شوہر بیوی کو رکھنے اور اس کے حقوق ادا کرنے کے لیے تیارہے تو ایسی صورت میں عدالت فسخ نکاح کے حوالے سے ڈگری جاری نہیں کرسکتی۔

صورت مسئولہ کے مطابق اگرعورت نے عدالت میں یہ دعوی کیا ہو کہ میرا شوہر مجھ پر ظلم وستم کرتا ہے،اور عدالت نے مکمل  تحقیق کر لی ہو اور بیوی کا دعوی ثابت ہو گیا ہو، نیز شوہر کو نوٹس بھیجنے کے باوجود شوہر خود یا اس کا وکیل عدالت میں حاضر نہ ہوا ہوتو ایسی صورت میں عدالت نے میاں بیوی کے درمیان جدائی کرتے ہوئے خلع کی جو ڈگری جاری کر دی ہو وہ تنسیخ نکاح کے حکم میں ہو گی اور عدالت کا یہ فیصلہ شرعا معتبر ہوگا لیکن اگر شوہر نے عدالت میں حاضرہو کریہ بیان دیا ہوکہ وہ بیوی کو ہر صورت رکھنے کے لیے تیار ہےیا دونوں کے مابین صلح ہوتی ہوتو پھرعدالت کا فیصلہ معتبر نہ ہوگا اور عورت بدستور شوہر کے نکاح میں رہے گی۔

قال الله تعالی :﴿فَإِنْ خِفْتُمْ أَلَّا يُقِيمَا حُدُودَ اللَّهِ فَلَا جُنَاحَ عَلَيْهِمَا فِيمَا افْتَدَتْ بِهِ﴾۔(البقرۃ:229)

وإذا تشاق الزوجان وخافا أن لا يقيما حدود الله فلا بأس بأن تفتدي نفسها منه بمال يخلعها به.(الهداية ،باب الخلع ،ج:2 ص:404)

وأما المتعنت الممتنع عن الإنفاق ففي مجموع الأمير ما نصه إن منعها نفقةالحال فلها القيام فإن لم يثبت عسره أنفق أو طلق و إلا طلق عليه ،قال محشيه أي طلق عليه الحاكم .(الحيلة الناجزة ،ص :133)

إذا طلق الرجل امرأته طلاقا بائنا أو رجعيا أو ثلاثا أو وقعت الفرقة بينهما بغير طلاق وهي حرة ممن تحيض فعدتها ثلاثة أقراء.(الفتاوى الهندية ،الباب الثالث عشر في العدة ،ج: 1،ص:526)