واضح رہے کہ اگر کوئی شخص کسی کوقرض پر پیسے دے کر قرضدار سےکسی اضافی چیز لینے کا مطالبہ نہ کرے تو یہ قرض حسنہ شمار ہوگا، اور قرض دینے والا شخص مستحق اجروثواب ہوگا،نیز اگرکوئی کمپنی اپنے ملازمین کو بلا سود قرضہ کی سہولت فراہم کرتی ہے،تو یہ کمپنی کی جانب سے اپنے ملازمین کے ساتھ احسان کا معاملہ ہے، لیکن اگر کمپنی نقصان اورخسارہ سے بچنے کے لیے اپنے قرض داروں پر کچھ ایسی شرائط لگادے،جو شریعت کے منافی  ہو، توایسی شرائط لگانا شرعاً جائز نہیں۔

صورت مسئولہ میں اگرکمپنی کی انتظامیہ نے خسارہ سے بچنے کے لیے یہ قاعدہ وضع کیا ہوکہ فوت شدہ مقروض کا قرضہ دوسرے قرض داروں سے وصول کیا جائے گا تو اگرچہ قرض داروں نے باقاعدہ اس بات کو مان لیاہواور قرض کا معاہدہ کرتے وقت اس پر دستخط بھی  کرچکے ہوں،تو پھر بھی ان سے اس طرح کی کٹوتی کرنا شرعاً جائز نہیں کیونکہ قرض دہندہ کو قرض کی وجہ سے جو مشروط نفع ملے وہ شرعاً سود کے زمرے میں آکرناجائز شمار ہوتا ہے۔

اسی طرح یہ معاملہ غررسے بھی خالی نہیں کیونکہ یہ معلوم نہیں کہ ملازمین قرض داروں میں سے کتنے مدت قرض کے دوران مریں گے اور ایک قرض دار ملازم کو فوت شدہ ملازمین کے بقایاجات میں سے کتنے ادا کرنے ہیں ،لہذا اس صورت حال میں ملازمین کےلیے کمپنی سے اس طرح کا بلاسود قرض لینا شرعاً جائز نہیں۔

مطلب كل قرض جر نفعا حرام:قوله ( كل قرض جر نفعا حرام ) أي إذا كان مشروطا .(ردالمحتار على الدر المختار،ج:5،ص:166)

ولا يجوز بيع السمك قبل أن يصطاد۔۔۔ولا بيع الحمل ولا النتاج" لنهي النبي عليه الصلاة والسلام عن بيع الحبل وحبل الحبلة ولأن فيه غررا.قال: "ولا اللبن في الضرع" للغرر فعساه انتفاخ، ولأنه ينازع في كيفية الحلب، وربما يزداد فيختلط المبيع بغيره.( الهداية،باب البیع الفاسد،ج:5،ص:96،95)

الغرر:ما يكون مجهول العاقبة لا يدرى أيكون أم لا.(التعريفات‎،ص:161)