واضح رہے کہ ٹریول ایجنسی والوں کا عمرہ زائرین سے ٹکٹ ،ویزا   وغیرہ  مختلف خدمات کے بدلے پیسے لینے کی شرعی حیثیت اجارہ کی ہے، کیونکہ اس کے عوض  ویزہ،سفر،اور رہائش وغیرہ کے منافع دیئے جاتے ہیں ،عقد اجارہ میں شرعا  یہ ضروری ہے کہ منافع کی نوعیت و مقدار مدت اور اجرت عاقدین کے درمیان اس طور پر متعین کیا جائے کہ باہمی تنازع کا امکان نہ رہے ۔

صورت مسئولہ میں اگر ادارہ  ایک لاکھ روپے لے کر متعین  مدت کے اندر سفر عمرہ کے متعین منافع(مثلا:ویزہ،ٹکٹ،رہائش وغیرہ)فراہم کرنے کا باقاعدہ عقد کرے تو شرعا یہ جائز ہو گا،کیونکہ اس صورت   میں وصول کی گئی رقم کی حیثیت اجرت کی ہو گی،تاہم ادارہ پر لازم ہو گا کہ اسی رقم میں  طے شدہ تمام منافع فراہم کرے چاہے اس رقم سے ادارہ کو نفع حاصل ہو جائے یا نہیں ،اور اگر ادارہ ایک لاکھ روپے لے کر عمرہ  کروانے کا صرف  وعدہ کرے باقاعدہ عقد نہ کرے تو ایسی صورت میں اس رقم کی حیثیت قرض کی ہو گی،اور قرض خواہ کے  لیے قرض پر منافع لینا سود ہے،اس وجہ سے اس رقم کے عوض عمرہ  کروانے کا وعدہ چونکہ قرض خواہ کے حق میں اپنے قرض پر منافع وصول کرنا ہے اس وجہ سے یہ  معاملہ شرعا جائز نہ ہو گا۔نیز یہ بھی واضح رہے کہ اس طرح  کے معاملات میں فراڈ اور دھوکہ دہی کے امکانات زیادہ ہوتے ہیں ،اس لیے ایسے معاملات سے بچنا چایئے۔

قال النبي صلى الله عليه وسلم ‌:الخديعة ‌في ‌النار ومن عمل عملا ليس عليه أمرنا فهو رد۔(صحيح البخارى،باب النجش،ج:3ص:69)

عن ابن عباس، قال: قال رسول الله صلى الله عليه وسلم: لا ‌ضرر ‌ولا ‌ضرار۔(سنن ابن ماجه،كتاب الأحكام،باب من بنى في حقه ما يضر بجاره،ج:2ص:784)

وقد «نهى رسول الله صلى الله عليه وسلم عن ‌قرض ‌جر ‌نفعا» وقيل هذا إذا كانت المنفعة مشروطة وأما إذا لم تكن فلا بأس بذلك.(دررالحکام شرح غرالأحکام،کتاب المضاربة،ج:2ص:310)

الإجارة...(هي) لغة: اسم للاجرة۔۔۔وشرعا: (‌تمليك ‌نفع).مقصود ‌من ‌العين (بعوض).(الدرالمختار،کتاب الإجارة،ج:6ص:569)