واضح رہے کہ وہ عمل جو کسی خلا ف شرع کام کے لیے پیش خیمہ بن رہا ہو،شریعت میں ناپسندیدہ ہے۔ جس طرح خود معصیت کا ارتکاب ناجائز ہے،اسی طرح معصیت میں تعاون بھی ناجائز ہے۔ چنانچہ جس طرح جھوٹ اور دھوکہ دہی ناجائز ہے،اسی طرح جھوٹ اور دھوکہ کے لیے راہ ہموار کرنا بھی ناجائز ہے۔  

1۔صورت مسئولہ کے مطابق، اگر فیکٹری کا مالک گاہک کی درخواست پر کم قیمت والی چیز کا بل زیادہ قیمت پر بناتا ہے اور یہ بل دھوکہ دہی یا جھوٹ کو ثابت کرنے یا اسے فروغ دینے کے لیے استعمال کیا جاتا ہے، تو یہ عمل ناجائز ہے، کیونکہ یہ گناہ میں تعاون کے مترادف ہے۔ اگرچہ فیکٹری والوں کا یہ عمل غلط ہے، لیکن اس سے ان کی کمائی پر کوئی فرق نہیں پڑتا،کیونکہ اگربنیادی معاہدے میں کوئی خرابی نہ ہو،تو ان کی آمدنی حلال ہوگی۔

2۔ اگر کاؤنٹر منیجر فیکٹری میں معاشی مجبوری کی وجہ سے کام کررہا ہو،اور اس کی فیکٹری میں خلاف ورزی پر قدرت نہ ہو، ساتھ ہی کسی دوسرے جائز کام کی تلاش میں بھی لگا ہو، تو اس کا فیکٹری میں کام کرنا جائز ہے اور اسے اس فیکٹری سے حاصل ہونے والی آمدنی حلال ہے۔ تاہم اسے چاہیے کہ جتناجلد ممکن ہو،کوئی اور ذریعۂ آمدنی تلاش کرے تاکہ گناہ پرتعاون کرنے کی وعید سے بچ سکے۔

قال الله تعالى: "وَتَعاوَنُوا عَلَى الْبِرِّ وَالتَّقْوى وَلا تَعاوَنُوا عَلَى الْإِثْمِ وَالْعُدْوانِ " قال ابن كثير: يَأْمُرُ تَعَالَى عِبَادَهُ الْمُؤْمِنِينَ بِالْمُعَاوَنَةِ عَلَى فِعْلِ الْخَيْرَاتِ وَهُوَ الْبَرُّ، وَتَرْكِ الْمُنْكِرَاتِ وَهُوَ التَّقْوَى وَيَنْهَاهُمْ عَنِ التَّنَاصُرِ عَلَى الْبَاطِلِ وَالتَّعَاوُنِ عَلَى الْمَآثِمِ وَالْمَحَارِمِ.(تفسير القرآن العظيم،مكتبة إمدادية مكة المكرمة،ج:2،ص:10)