کعبۃ اللہ دنیا کی سطح پر اللہ تعالی کے نزدیک افضل ترین  مقام ہے، جس کا احترام رکھنا اور بے ادبی سے بچنا مسلمانوں پر لازم ہے، اس وجہ سے احادیث مبارکہ میں بیت اللہ کی جانب پیشاب کرنے سے ممانعت آئی ہے، چنانچہ رسول اللہ ﷺ کے ارشاد مبارک کا ترجمہ  ہے: جب تم بیت الخلا آؤ تو پاخانہ یا پیشاب کے وقت قبلہ کی طرف منہ نہ کرو اور نہ پیٹھ۔ اسی طرح ابو ایوب انصاری رضی اللہ عنہ فرماتے ہیں کہ جب ہم شام گئے تو وہاں پر بیت الخلا قبلہ کی جانب بنے ہوئے تھے، تو ہم تکلف کے ساتھ گھوم کر بیٹھتے  تھے، یعنی حتی الامکان قبلہ کی جانب منہ یا پیٹھ کرنے سے بچنے کی کوشش کرتے، اور استغفار کرتے۔

صورت مسئولہ کے مطابق  جب تک یہ ممکن ہوکہ یہ واش روم توڑ کر نئے واش روم بنائےجا ئیں تو ان  کو توڑ کراسلامی  تعلیمات کے مطابق نئے واش روم بنائےجائیں لیکن اگر یہ ممکن نہ ہو تو اسی بیت الخلاء میں  جتنا ہو سکے گھوم کر اس طرح بیٹھاجائے کہ پشت قبلہ کی طرف نہ رہے۔

"عن أبي أيوب الأنصاري، قال: قال رسول الله صلى الله عليه وسلم: «إذا أتيتم الغائط فلا تستقبلوا القبلة بغائط ولا بول، ولا تستدبروها، ولكن شرقوا أو غربوا» قال أبو أيوب: فقدمنا الشام فوجدنا مراحيض قد بنيت مستقبل القبلة، فننحرف عنها، ونستغفر الله".(سنن الترمذي،أبواب الطهارة،باب في النهي عن استقبال القبلة بغائط أو بول،رقم الحديث:8،ج:1،ص:13)

"(كما كره) تحريما (استقبال قبلة واستدبارها ) لأجل (بول أو غائط)".(الدر المختار على صدر رد المحتار،كتاب الطهارة،فصل  الإستنجاء، ج:1، ص:341)