شریعتِ مطہرہ کی رو سے قرض کا معاملہ کرتے وقت کوئی ایسی شرط لگانا جائز نہیں جس میں قرض دینے والے کا فائدہ ہو۔ کیونکہ قرض خواہ کا شرط لگا کر فائدہ حاصل کرنا سود کے زمرے میں داخل ہوکر ناجائز اور حرام ہے۔

لہذا صورت مسئولہ  کے مطابق اگر واقعی سائل کے ماموں نے سائل کے ساتھ مشترکہ طور پر دکان نہ خریدی ہو، البتہ سائل کو پچاس لاکھ روپے قرض کے طور پردئیے ہوں، تو ایسی صورت میں اس کا قرض کی رقم واپس لینے تک ہر ماہ دکان کے کرایہ کے نام سے دو ہزار روپے وصول کرنا قرض پر منافع وصول کرنا ہے جو سود کے زمرے میں داخل ہونے کی وجہ سے شرعاً ناجائز اور حرام ہے،لہذا اس کے لیے یہ پیسے لینا درست نہیں،اوراب تک جتنی رقم اس مد میں وصول کر چکا ہے، وہ واپس کرےیا قرض میں سے منہا کر لے۔

وأما الذي يرجع إلى نفس القرض فهو أن لا يكون فيه جر منفعة فإن كان لم يجز ۔۔۔ أو أقرضه وشرط شرطا له فيه منفعة لما روي عن رسول الله صلى الله عليه وسلم أنه نهى عن قرض جر نفعا ولأن الزيادة المشروطة تشبه الربا لأنها فضل لا يقابله عوض والتحرز عن حقيقة الربا وعن شبهة الربا واجب۔ (بدائع الصنائع فى ترتيب الشرائع، كتاب القرض، فصل في الشروط، ج:10، ص:597)

والحاصل أنه إن علم أرباب الأموال ‌وجب ‌رده ‌عليهم، وإلا فإن علم عين الحرام لا يحل له ويتصدق به بنية صاحبه۔ (رد المحتار على الدر المختار، مطلب فيمن ورث مالا حراما، ج:7، ص:301، دار الكتب العلمية)