اجرت کے بدلے میں کوئی چیز لکھنا  یا لکھوانا اجارہ کہلاتا ہے اور اجارے میں ایسی شرط لگانا ،جس کاعقدتقاضانہ کرے اوراس میں متعاقدین میں سے کسی ایک کانفع ہو،تو ایسی شرط اجارہ کو فاسد  کر دیتی ہے۔

سوال میں ذکر کردہ طریقہ کار کے مطابق ایسے گروپ جوائن کر کے  کمائی کرنے میں درج ذیل شرعی قباحتیں پائی جاتی ہیں،اس لیے اس سے اجتناب کرنا چاہئے :

1۔گروپ جوائن کرنے کے لیے سب سے پہلے مشروط طور پررجسٹریشن فیس کے نام پر رقم دینی پڑتی ہے اور اس رقم کے مقابلے میں قابلِ معاوضہ کوئی چیز بھی  نہیں ہوتی۔ یہ شرط شرعی لحاظ سے درست نہیں، کیونکہ اس میں ایک معاملے کو دوسرے کے ساتھ مشروط کرنا لازم آتا ہے،جو شرعاً جائز نہیں۔

2۔  اگر لکھنے کے لیے دیے جانے والے مضامین طلبہ یا ان حضرات کے ہوں، جن پر ان مضامین کو خود تحریر کرنا لازم تھا، مگر وہ لوگ کسی دوسرے سے مضامین لکھوا کر اپنی طرف منسوب کرکے پیش کریں گے،ایسی صورت میں اس سے حاصل ہونے والی کمائی بھی کراہت سے خالی نہ ہوگی، کیونکہ جائز مضمون پر مشتمل تحریر/مقالہ لکھنا اگرچہ گناہ نہیں، بلکہ مباح عمل ہے٬ جس کی اجرت حلال ہے، لیکن یہاں دھوکہ دہی کے کام میں معاونت کی وجہ سے اس میں کراہت آجائے گی۔

3۔ کام کے ساتھ مزید ممبرز کو ایڈ کروانے کی شرط بھی لگائی جاتی ہے اور اس میں اسائمنٹ لکھوانےوالے   کا نفع ہے اورعقداس کاتقاضابھی نہیں کرتا۔ لہذااجرت کو ممبر ایڈ کرنے کی شرط کے ساتھ مشروط کرنا شرعا جائز نہیں،نیزگروپ جوائن کرنے والا شخص رجسٹریشن کے نام پر اپنا سرمایہ داؤ پہ لگا دیتا ہے،جبکہ آئندہ مطلوبہ شرائط کے مطابق ممبر بنا لینا یقینی نہیں،بلکہ  ایک موہوم امید کی حدتک ہوتا ہے ، یعنی ممبر ایڈ کرنے کی صورت میں اجرت ملے گی ورنہ نہیں لہذا یہ قمار (جوے)کے مترادف ہے۔

4۔ نیز عموماًاس طرح کے گروپس بنانے کا مقصد اسائمنٹیں  لکھوانا نہیں ہو تا بلکہ لوگوں سے فیسیں بٹورنا ہو تا ہے ،لہذا اس وجہ سے بھی  ایسے  گروپس کو جوائن کرنے سے اجتناب کرنا چاہئے۔

قال الله تعالی:﴿يَاأَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ﴾(سورۃ المائدۃ:90)

عن عمرو بن شعيب، عن أبيه، عن جده، قال:" نهى رسول الله صلى الله عليه وسلم عن سلف وبيع، وعن شرطين في بيع واحد، وعن بيع ما ليس عندك،  وعن ربح ما لم يضمن".(سنن النسائي، كتاب البيوع، باب:شرطان في بيع،رقم الحديث :4635)

"أن كل شرط لا يقتضيه العقد وهو غير ملائم له، ولم يرد الشرع بجوازه، ولم يجز التعامل فيه وفيه منفعة لأهل الاستحقاق مفسد"۔(تبيين الحقائق، كتاب البيوع، باب البيع الفاسد، ج:4، ص:57)

"لأن القمار من القمر الذي يزداد تارة وينقص أخرى، وسمي القمار قمارا؛ لأن كل واحد من المقامرين ممن يجوز أن يذهب ماله إلى صاحبه، ويجوز أن يستفيد مال صاحبه وهو حرام بالنص"۔(رد المحتارعلى الدر المختار، كتاب الحظر والإباحة، باب الإستبراء وغيره، فصل في البيع ، ج:9 ص:577)