واضح رہے کہ عربی زبان میں "الحلیم"  باری تعالی کے صفاتی ناموں میں سے ایک نام ہے، البتہ لفظ "حلیم" اردو زبان میں گندم سے بنی ایک مخصوص کھانے کے لیے استعمال ہوتا ہے، نیز  اللہ رب العزت کے کچھ صفاتی نام ایسے ہیں جو صرف باری تعالی کے ساتھ مخصوص ہیں، غیر اللہ پر اس کا اطلاق نہیں کیا جاسکتا، جیسے "الرحمٰن"،’’الرزاق‘‘ وغیرہ۔  جب کہ کچھ ایسے صفاتی نام ہیں جو غیر اللہ کے لیے  استعمال کیے جا سکتے ہیں، جیسے: مصور،  وکیل، حلیم وغیرہ۔اور ’’حلیم‘‘ کا معنیٰ ہے’’بردبار‘‘۔ اور یہ صفت اللہ تعالیٰ کی صفات عامہ میں سے ہے۔ اللہ تعالیٰ کی صفت خاصہ میں سے نہیں ہے،لہذا کھانے کی ڈش کو  "حلیم" کہنے میں اللہ رب العزت کی اس صفت کی توہین لازم نہیں آتی ،اس  لیے  کہ جب کوئی کہتا ہے کہ میں "حلیم"  کھا رہا ہوں یا "حلیم" بنائی ہے تو سننے والوں کا ذہن کھانے کی مخصوص ڈش ہی کی طرف جاتا ہے نہ کہ باری تعالی کی صفت  "الحلیم"  کی طرف۔

"وذكر غير واحد من العلماء ‌أن ‌هذه ‌الأسماء منها ما يرجع إلى صفة فعلية ومنها ما يرجع إلى صفة نفسية ومنها ما يرجع إلى صفة سلبية. ومنها ما اختلف في رجوعه إلى شيء مما ذكر وعدم رجوعه وهو الله والحق أنه اسم للذات وهو الذي إليه يرجع الأمر كله، ومن هنا ذهب الجل إلى أنه الاسم الأعظم، وتنقسم قسمة أخرى إلى ما لا يجوز إطلاقه على غيره سبحانه وتعالى كالله والرحمن وما يجوز كالرحيم والكريم وإلى ما يباح ذكره وحده كأكثرها وإلى ما لا يباح ذكره كذلك كالمميت والضار فإنه لا يقال: يا مميت يا ضار بل يقال: يا محيي يا مميت ويا نافع يا ضار، والذي أراه أنه لا حصر لأسمائه عزت أسماؤه في التسعة والتسعين"

(تفسير روح المعاني ،سورۃ الاعراف،ج:5،ص:115)

"والحلم، بالكسر : الأناة، والعقل، ج: أحلام وحلوم، وﻣﻨﻪ:(أم تأمرهم أحلامهم بهذا) وهو حليم. ج: حلماء وأحلام"۔(القاموس المحيط، فصل الحاء، ج:1، ص:1096)

"(ع- صف) (1) بردبار۔ متحمل مزاج۔ نرم۔ ملائم (2) (ار- ا- مذ) ایک قسم کا کھانا جو اناج، گوشت اور مسالے ڈال کر پکایا جاتا ہے"۔( فیروز اللغات: مادہ: ح-ل، ص: 608)