جب کسی عورت کا شوہر فوت ہو جائے تواگر وہ حاملہ ہو تو اس کی عدت وضع حمل ہےاور اگر حاملہ نہ ہو تواس پر چار ماہ دس دن  عدت گزارنا ضروری ہے، اس کے بعد اس کے لیے گھر سے نکلنا اور دوسری شادی کرنا جائز ہوتا ہے،نیز عدت کے دوران زیب وزینت اختیار نہیں کرے گی، جو چیز شرعاً یا عرفا ًزینت شمار  ہوتو عدت کے دوران معتدہ عورت اس سے اجتناب کرے گی ۔

صورت مسئولہ کے مطابق اگر بیوہ عورت حاملہ ہو تو اس کی عدت وضع حمل ہوگی اور اگر حاملہ نہ ہو تواس پر چار ماہ دس دن  عدت گزارنا ضروری ہوگا، چوڑیاں پہننا، سرخ کپڑے یا نئے کپڑےپہننا زیب وزینت کے زمرے میں داخل ہے،اس لیے  بیوہ عدت  کے دوران اس سے اجتناب کرے، تاہم کپڑوں کی قلت کے وقت  نئے کپڑے پہن سکتی ہے۔

قال اللہ تعالی﴿وَالَّذِينَ يُتَوَفَّوْنَ مِنْكُمْ وَيَذَرُونَ أَزْوَاجًا يَتَرَبَّصْنَ بِأَنْفُسِهِنَّ أَرْبَعَةَ أَشْهُرٍ وَعَشْرًا﴾(البقرۃ:234)

وقال:﴿وَأُولَاتُ الْأَحْمَالِ أَجَلُهُنَّ أَنْ يَضَعْنَ حَمْلَهُنَّ﴾(الطلاق:4)

"وشرعا ترک الزینة ونحوھا لمعتدۃ بائن أو موت"۔(ردالمحتار علی الدر المختار،کتاب الطلاق،فصل فی الحداد،ج:5،ص:219)

"والحداد:الاجتناب عن الطیب۔۔۔والثوب الاحمر،ولبس الحلی والتزین ۔قال شمس الأئمة:المراد من الثیاب المذکورۃ ماکان جدیدا منھا تقع به الزینة،أما إذا کان خلقا لا تقع به الزینة فلا بأس بة"۔(الفتاوى الهندية، كتاب الطلاق، الباب الرابع عشرفى الحداد، ج:1، ص :585)