مدرسہ میں داخلہ کے وقت طلبا سے فارم میں اس بات پر دستخط لیا جاتا ہے کہ مہتمم یا ان کا نائب ان کی طرف سے اس بات کا وکیل ہے، کہ زکوۃ اور دیگر صدقات وصول کرکے اپنی صوابدید کے مطابق طالب علم اور مدرسہ کے مفاد میں خرچ کریں۔ نیز تحریر پردستخط  کرنے والا، اس تحریرکی توثیق کرنے والاہوتا ہے۔ اس لیے یہ ضروری ہے کہ دستخط کرنے والے میں اتنی صلاحیت ہوکہ وہ جانتا ہوکہ وہ کس چیز کی توثیق کررہا ہے، اوراس پر کسی قسم کا دباؤ یا زبردستی نہ ہو۔

صورت مسئولہ کے مطابق اگروکالت کےتمام تقاضوں کی رعایت کے ساتھ  فارم پردستخط کرالیا جائے تومہتمم یا اس کانائب طلبہ کا وکیل متصورہوگا۔ لیکن بسا اوقات اس طرح کرنے میں تملیک محض کاغذی کاروائی تک محدود رہ جاتی ہے اور حقیقی تملیک حاصل نہیں ہوتی۔ لہذا اس کی بہتراوراحتیاط پرمبنی صورت یہ ہے کہ مہتمم  چندہ دہندگان کا وکیل ہو اور زکوۃ کی رقم مستحق طلبا کو ملکیتاً دے دی جائے، پھراخراجات کی مد میں ان سے وصول کرکے ان کی ضروریات اور مدرسہ کے دیگر مفاد میں خرچ کرلی جائے۔

ويشترط أن يكون الصرف (‌تمليكا) ‌لا ‌إباحة كما مر (لا) يصرف (إلى بناء) نحو (مسجد و) لا إلى (كفن ميت وقضاء دينه).(الدر المختار مع رد المحتار، كتاب الزكوة، باب مصرف الزكوة، ج3، ص:291)

وقدمنا أن الحيلة أن يتصدق على الفقير ثم يأمره بفعل هذه  الأشياء.(الدر المختار على صدر ردالمحتار، كتاب الزكاة، باب المصرف، ج:3، ص:294)