واضح رہے کہ اگرزوجین کا کسی وجہ سے آپس میں ناچاقی پیدا ہو جائےجس کی وجہ سے ازدواجی زندگی مشکل ہو جائے تو ایسی صورت میں خاوند کوشرعاًطلاق کا اور بیوی کو خلع کا حق حاصل ہے ،البتہ خلع کے بارے میں شریعت کا اصول یہ ہے کہ اگر قصور شوہر کی طرف سے ہو تو دیانتاً  بیوی سے مال یا کسی بھی چیز کا مطالبہ کرنا صحیح نہیں اور اگر قصور بیوی کا ہو تو شوہر کے لیے مہر کی مقدارتک مال لینا بلا کراہت جائز ہے،مہر سے زیادہ لینا مناسب نہیں۔

صورت مسؤلہ میں اگر واقعی میاں بیوی کے درمیان ایسی ناچاقی ہو جس کی وجہ سےباہم ازدواجی زندگی گزارنا مشکل ہو اورمصالحت کی بظاہر کوئی صورت ممکن نہ ہواور ناچاقی بھی بیوی کی طرف سے ہوتو شوہر بیوی کو مہر کے بدلے میں خلع دے سکتا ہے۔ خلع کرنے سے ایک طلاق بائن واقع ہو جائے گی اور بیوی شوہر سے آزاد ہو جائے گی۔

إذا ‌تشاق ‌الزوجان وخافا أن لا يقيما حدود الله فلا بأس بأن تفتدي نفسها منه بمال يخلعها به فإذا فعلا ذلك وقعت تطليقة بائنة ولزمها المال كذا في الهداية۔إن كان النشوز من قبل الزوج فلا يحل له أخذ شيء من العوض على الخلع وهذا حكم الديانة فإن أخذ جاز ذلك في الحكم ولزم حتى لا تملك استرداده كذا في البدائع۔وإن كان النشوز من قبلها كرهنا له أن يأخذ أكثر مما أعطاها من المهر ولكن مع هذا يجوز أخذ الزيادة في القضاء كذا في غاية البيان۔(الفتاوى الهندية،كتاب الطلاق، الباب الثامن في الخلع وماحكمه،الفصل الأول في شرائط الخلع،ج:1،ص:488)