شرعی نقطہ نظر سے زکوۃ لینے کا مستحق وہ شخص ہے جو صاحب نصاب نہ ہو،اگر کسی شخص کے پاس نصاب کے بقدر مال موجود ہو تو ایسے شخص کے لیے زکوۃ لینا جائز نہیں۔ البتہ اگرغیر مستحق نے زکوۃ لے لیا تواس پر لازم ہے کہ  زکوہ دینے والے کو واپس کرے۔

لہذا صورت مسؤلہ کے مطابق سائل اگر چار لاکھ کا مالک ہے تو  صاحب نصاب ہونے کی وجہ سے زکوۃ وصول نہیں کر سکتا، لہذا اس کی ذمہ داری بنتی ہے کہ مزکی کو  زکوۃ کی رقم واپس کرے، مستحقین کو نہ دے کیونکہ مستحقین کو دینے کے لیے اس کو وکیل  نہیں بنایا گیا ہے، اور نہ ان پیسوں کو اپنے استعمال میں لاناجائز  ہے، البتہ مزکی کی صحت زکوۃ کے لیے اتنا کافی ہے کہ اس کا  زکوۃ لینے والے کے بارے میں غالب گمان ہو کہ یہ مستحق زکوۃ ہے،سائل پر لازم ہے کہ مزکی کو بتائے کہ میں صاحب نصاب ہوں یا پھراپنی ملکیت میں موجود رقم گھر کے افراد میں سے کسی کو ہبہ کر کے اس کو قبضہ بھی دے دے، ایسی صورت میں جب صاحب نصاب نہ رہے گا تو پھر زکوۃ وصول کر سکتا ہے۔

لا يجوز دفع الزكاة إلى من يملك نصابا أي مال كان دنانير أو دراهم أو سوائم أو عروضا للتجارة أو لغير التجارة فاضلا عن حاجته في جميع السنة ۔(الفتاوى الهندية، كتاب الزكوة،الباب السابع في المصارف، ج:1،ص:251،دار الفكر)

إذا شك وتحرى فوقع في أكبر رأيه أنه محل الصدقة فدفع إليه۔۔۔جاز بالإجماع۔( الفتاوى الهندية، كتاب الزكوة،الباب السابع في المصارف، ج:1،ص:251،دار الفكر)

والحاصل أنه إن علم أرباب الأموال ‌وجب ‌رده ‌عليهم، وإلا فإن علم عين الحرام لا يحل له ويتصدق به بنية صاحبه۔(رد المحتار على الدر المختار،مطلب فيمن ورث مالا حراما،ج:7،ص:301،دار الكتب العلمية)