واضح رہے کہ  کسی بھی شعبے کا لائسنس جو کسی شخص کو حکومت کی طرف سے جاری کیا جاتا ہے،وہ اس شخص کے لیے اس شعبے میں کام کرنے کا اجازت نامہ ہوتا ہے،کسی اورکے لیے اس لائسنس کو استعمال کرنے کی قانوناً اجازت نہیں ہوتی  اور حکومت کی ایسی جائز پابندیاں  جو مفاد عامہ کے لئے ہوں ان کی پاسداری کرنا شرعا بھی لازم ہوتاہے اور اس کی خلاف ورزی   جائز نہیں ہوتی، لہذا فارمیسی چلانے کے لیے لائسنس کی قانونی شرط چونکہ عوامی مصلحت کی خاطر لگائی گئی ہے،تاکہ کوئی ایسا شخص فارمیسی نہ چلا سکے جو ادویات  کی پوری پہچان نہ رکھتا ہو،کیونکہ  غیر تربیت یافتہ شخص کے فارمیسی  چلانے کی وجہ سے لوگوں کی صحت اور زندگیوں کو سنگین قسم کے خطرات لاحق ہو  سکتے ہیں،اس لیے فارمیسی   چلانے  کے لیے لائسنس کا اہتمام ضروری ہے۔

صورت مسئولہ میں  فارمیسی لائسنس جس کے لیے گورنمنٹ نے جاری کیا ہو، اس کے علاوہ کو استعمال کرنے کی اجازت نہیں ، نیز یہ اجازت نامہ کوئی ایسا مال نہیں ہے جس کو کرایہ پر دیا جاسکے یا فروخت کیا جاسکے، اس لیے اس کو کرایہ پر دینا اور لینا ناجائز ہے۔ اور محض لائسنس کی وجہ سے اس کی تنخواہ لینا جائز نہیں،کیونکہ لائسنس  حکومت کی طرف سے ایک اجازت نامہ ہے کوئی مال نہیں جس کو اجارہ پر دیا جاسکے۔

قال اللہ تعالی: ﴿وَلَا تَعَاوَنُوا عَلَى الْإِثْمِ وَالْعُدْوَانِ﴾(سورةالمائدة،آيت نمبر:2)

وقال تعالی: ﴿وَاجْتَنِبُوا قَوْلَ الزُّورِ﴾(سورة الحج،آيت نمبر:30)

والأجرة انما تكون في مقابلة العمل.(ردالمحتارعلى الدر المختار،كتاب النكاح،مطلب:أنفق على معتدةالغير،ج4،ص305)

تصرف الإمام على الرعية منوط بالمصلحة.(الأشباه والنظائر لابن نجيم،القاعدة الخامسة، ص:62)