میاں بیوی کے ازدواجی تعلقات قائم ہونے کے بعد اگر شوہر باوجود قدرت کے بیوی کے حقوق اور نان نفقہ وغیرہ کی ادائیگی نہ کرے اور اس پر ظلم وستم کرےجس کی وجہ سے عورت کے لیے خاوند کے ساتھ زندگی گزارنا مشکل ہو تو ایسی صورت میں اصل حکم تو یہ ہے کہ عورت شوہر کو طلاق یا خلع پر راضی کرکے اس سے چھٹکارا حاصل کرے تا ہم اگر شوہر نہ حقوق ادا کررہا ہو اور نہ ہی طلاق یا خلع پر راضی ہوتا ہو تو ایسی صورت میں شوہر متعنت کہلاتا ہے اور متعنت کی بیوی کو مسلمان حاکم یا عدالت کی طرف رجوع کرنے کا اختیار ہے۔عدالت کی طرف رجوع کرنے کے بعد اگر عدالت نے مکمل تحقیق کی اور عورت نےشوہر کے ظلم و ستم کو ثابت کیاتو عدالت شوہر کو حکم دے گی کہ یا تو بیوی کو صحیح طریقے سے آباد کرے یا طلاق دے اگر وہ آباد کرے تو ٹھیک ،ورنہ اگر انکار کرے یا عدالتی  سمن ملنے کے باوجود عدالت میں شوہر یا اس کا وکیل حاضر نہ ہو اور بیوی اس کی زوجیت سے نکلنا چاہتی ہو تو پھر عدالت عورت کو تنسیخ نکاح کی ڈگری دے سکتی ہے۔

صورت مسئولہ کے مطابق  شوہرکا عدالتی سمن ملنے کے باجود حاضر نہ ہونے سے اس کا تعنت ثابت ہوتا ہے، لہذاعدالت نے  اس بنا پرتنسیخ نکاح کی  جوڈگری دی ہے وہ شرعا معتبر ہے۔  عورت عدت گزرنے کے بعد دوسری جگہ نکاح کرسکتی ہے۔

قال الله تعالى:﴿فَإِنۡ ‌خِفۡتُمۡ أَلَّا يُقِيمَا حُدُودَ ٱللَّهِ فَلَا جُنَاحَ عَلَيۡهِمَا فِيمَا ٱفۡتَدَتۡ بِهِ﴾(البقرة:229) 

وإذا ‌تشاق ‌الزوجان وخافا أن لا يقيما حدود الله فلا بأس بأن تفتدي نفسها منه بمال يخلعها به.(الهداية،باب الخلع،ج:2،ص:404)

وأما المتعنت الممتنع عن الإنفاق ففي مجموع الأمير ما نصه إن منعها نفقة الحال فلها القيام فإن لم يثبت عسره أنفق أو طلق وإلا طلق عليه، قال محشيه:قوله(وإلا طلق عليه) الحاكم من غير تلوم.(الحيلة الناجزة،ص:133)