واضح رہے کہ وراثت کی تقسیم سے پہلے  کسی وارث کا اپنے حصہ سے بلا عوض دست بردار ہوجانا ،يا معاف کردینا شرعا معتبر نہیں ہے، البتہ ترکہ تقسیم ہوجائے تو پھر ہر ایک وارث اپنے حصے پر قبضہ کرنے کے بعد اپنا حصہ کسی کو دینا چاہے، تو یہ شرعا جائز اور معتبر ہے۔

صورت مسئولہ میں اگر  والدہ  ترکہ کی تقسیم سے پہلے اپنے حصہ سے دستبردار ہورہی ہے تو اس  کا  یہ دستبردارہونا  شرعا معتبر نہیں، لہذا مرحومہ کے ورثا  پر لازم ہے کہ مرحومہ  کی جائیداد میں والدہ کا جو شرعی حصہ ہے وہ حصہ اس کو دے دیں ،جب وہ اپنے حصے پر قبضہ کردے تو پھر اگر وہ اپنے حصے سے  دستبردار ہوجائے تو یہ شرعا جائز اور معتبر ہوگا ،نیز یہ بھی جائز ہے کہ   والدہ میراث کے تقسیم سے پہلے ترکہ میں سے کسی چیز پر راضی ہو کر اس کولے لے اور اس کے بدلے اپنا حصہ چھوڑدے ۔

‌الارث ‌جبري ‌لَا يسْقط بالاسقاط.( تكملة رد المحتار على الدر المختار،باب التحالف،ج:8،ص:116)

لو قال وارث تركت حقي لا يبطل حقه إذ الملك ‌لا ‌يبطل ‌بالترك.( البحر الرائق شرح كنز الدقائق،جعل الواقف غلة الوقف لنفسه أو جعل الولاية إليه،ج:5،ص:243)

من صالح علی شيء من التركة : فاطرح سهامه من التصحيح ثم اقسم ما بقي من التركة علي سهام الباقين۔(السراجي في الميراث،فصل في التخارج،ص:93)