شریعت مطہرہ کی رو سے کلمہ کفر کہتے وقت یا کافر مذہب کی طرف اپنی نسبت کرتے وقت اگرکفر کا عقیدہ بھی ہو  تو ایسی صورت میں ایسا شخص دائرہ اسلام سے خارج ہو جاتا ہے لیکن اگر کفر کا عقیدہ نہ ہو بلکہ کسی دنیوی مفاد کی خاطر کسی اور مذہب کی طرف اپنے آپ کو منسوب کرے اور نيت نہ ہوتو اگرچہ یہ بڑی جرأت اور عظیم گناہ ہےاور اس سے اس شخص کے ایمان کو خطرہ لاحق ہوتا ہے کیونکہ ایسا شخص آگے جاکر دنیوی مفاد کی خاطر ایمان سے ہاتھ دھوسکتا ہے تاہم عقیدہ نہ ہونےکی وجہ سے وہ کافر نہیں ہوتا۔

صورت مسؤلہ کے مطابق جوشخص یہ عقیدہ رکھتے ہوئے  اپنے آپ کو یہودی کہے ،کہ وہ  یہودی ہے یا ویزہ فارم میں اپنے آپ کو”غیرمسلم “ ظاہر کرے اور عقیدہ میں بھی اسلام سے انحراف ہو،تو اس سے وہ کافر ہوگا  اور اس پر تجدید ایمان اور تجدید نکاح لازمی ہے ۔لیکن اگر اس کا عقیدہ کفر کا نہ ہو بلکہ صرف دنیوی مفاد کی خاطراس طرح کرے تو ایسے شخص کو کافر نہیں کہا جاسکتا تاہم اس عمل پر سچے دل سے توبہ و استغفار لازم ہے اور کسی کو ایسا دھوکہ دینا حرام ہے خاص کر غیر مسلم سے ایسے دھوکہ آمیز رویہ اسلام کی بدنامی کے سوا اور کچھ نہیں۔

ومن أتی بلفظة الكفر مع علمه أنها لفظة الكفرعن اعتقاده فقد كفر،ولولم يعتقد أولم يعلم أنهالفظة الكفر، ولكن أتی بها علی اختيار فقد كفر عند عامة العلماء لا يعذر بالجهل، وفی الخانية:وقال بعضهم :الجاهل إذا تكلم بكفر ولم يدر أنه كفر لا يكون كفراً ويعذر بالجهل، وفی الينابيع:قال أبوحنيفة ؓ:لا يكون الكفرکفراًحتی يعقد عليه القلب.(الفتاوی التتارخانية، كتاب أحكام المرتدين، الفصل إجراء كلمة الكفر،ج:7،ص:282)