واضح رہے کہ عاریت پر لی ہوئی چیز لینے والے کے پاس امانت  ہوتی ہے، اور مالک کے مطالبہ کرنے پرامانت کو اس کی طرف لوٹانا شرعاً ضروری ہے۔نیز دعویٰ کرنے والے کے پاس اگر اپنے دعویٰ پر گواہ موجود ہوں تو اس کے قول کا اعتبار کیاجائے گا،تاہم اگر اس کے پاس گواہ نہ ہوں تو پھر مدعیٰ علیہ سے قسم لی جائے گی اور قسم اٹھانے کے بعداس کے حق میں فیصلہ کیا جائے گا۔

صورت مسئولہ کے مطابق اگر واقعی شوہر نے بیوی کو سونا عاریت کے طور پر دیاتھا   تو اس پر بیوی کی ملکیت ثابت نہیں،بلکہ اس پر لازم ہے کہ وہ یہ سونا واپس کردے۔ نیز اگر واقعتاً برادری کے  رواج کے مطابق  لڑکے کے گھر والوں کی طرف سے لڑکی کو عاریتاً سونے کے زیورات دئیے جاتے ہوں ،لیکن بیوی اس رواج کے خلاف کا دعویٰ کررہی ہو کہ  مجھے یہ سونا ملکیتاً دیا گیا ہےتو چونکہ عورت خلافِ ظاہرملکیت کا دعویٰ کررہی ہے،اس لیے وہ مدعیہ ہےلہذا اگراس   کے پاس  دو معتبرگواہ موجود ہوں اور اس کے دعویٰ کے مطابق گواہی دیں  تو  اس کا قول معتبر ہوگا۔ لیکن اگر بیوی کے پاس گواہ موجود نہ ہو ں تو شوہر قسم اٹھائےگا کہ میں نے  یہ سونا رواج کےمطابق عاریتاًدیا تھانہ کہ مہر یا ملکیت کے طور پر۔ اگر وہ  قسم کھالے تو اس کا قول معتبر شمار کیا جائے گا،لہذا بیوی سونا واپس کرے گی۔

البینۃ علی المدعي واليمين على من أنكر.(سنن الترمذي، أبواب الأحكام،باب ما جاء أن البينة على المدعي،ج:3، ص:618)

وقيل ‌المدعي ‌من ‌يلتمس ‌غير الظاهر والمدعى عليه من يتمسك بالظاهر، وقال محمد في الأصل المدعى عليه هو المنكر، وهذا صحيح. (البحر الرائق شرح كنز الدقائق، كتاب الدعوى، ج:7، ص:193)

هي (تمليك المنافع مجانا) أفاد بالتمليك لزوم الايجاب والقبول ولو فعلا.وحكمها: كونها أمانة. (الدر المختار، كتاب العارية،ص:556)