کرایہ دار کے لیے کرایہ پر لی ہوئی چیز کو آگے کرایہ پر دینا جائز ہے بشرطیکہ جس کو کرایہ پر دے رہا ہو، اس کے استعمال سے اس چیز کے عین کو نقصان نہ ہو، نیز جتنے کرایہ پر خود لی ہو اس سے زیادہ کرایہ پر نہ دے۔ ہاں البتہ دو صورتوں میں اضافی کرایہ پر دے سکتا ہے: ۱۔ دوسرا کرایہ پہلے کی جنس سے نہ ہو، مثلا: اگر پہلا کرایہ روپوں میں ہو تو دوسرا کرایہ ڈالر میں ہو۔ ۲۔ کرایہ دار نے کرایہ پر لی ہوئی چیز میں کوئی اضافی کام کیا ہو مثلا:دکان میں سیلنگ، ٹائلز ، الماریاں، کاؤنٹروغیرہ لگائے ہوں تو ایسی صورت میں پہلے سے زیادہ کرایہ پر دے سکتا ہے۔

صورت مسئولہ میں سائل کے لیے کسی اور کودکان کرایہ پر دیناجائز ہے بشرطیکہ اس کے کام سے دکان کو نقصان نہ ہو۔ اسی طرح سائل نے اگر دکان میں اپنی طرف سے کوئی اضافی کام کیا ہوتو پھر اس کے لیے ایک لاکھ اضافی لینا جائز ہے، لیکن اگر اس نے کوئی اضافی کام نہ کیا ہوتو پھر اس کے لیے یہ ایک لاکھ اضافی کرایہ لینا شرعا جائز نہیں۔

(وله السكنى بنفسه ‌وإسكان ‌غيره بإجارة وغيرها) وكذا كل ما لا يختلف بالمستعمل يبطل التقييد لانه غير مفيد، بخلاف ما يختلف به كما سيجئ، ولو آجر بأكثر تصدق بالفضل إلا في مسألتين: إذا آجرها بخلاف الجنس أو أصلح فيها شيئا. (الدر المختار شرح تنوير الأبصار وجامع البحار، ص:574، دار الكتب العلمية، بيروت)