واضح رہے کہ میاں بیوی کے ازدواجی تعلق قائم ہونے کے بعد شوہر پر بیوی کے حقوق اور نان نفقہ کی ادائیگی لازم ہوجاتی ہے،چنانچہ اگر  شوہر بیوی کے حقوق ،نان نفقہ کی ادائیگی میں کسی قسم کی  کوتاہی نہیں کررہا ہو اور عورت اس کے باوجود تنسیخ نکاح  کا مطالبہ  کر رہی ہو تو ایسی صورت میں عورت کا  عدالت سے  تنسیخ نکاح  کی ڈگری لینا جائز نہیں،اور ڈگری حاصل کرنے کی صورت میں عورت قانونی طور پر اگرچہ آزاد ہوتی ہے ،لیکن شرعاً آزاد نہیں ہوتی لہذا اس پر عدت بھی لازم نہیں ہوتی اور نہ ہی وہ کسی دوسرے مرد سے نکاح کرسکتی ہے  کیونکہ وہ اسی سابقہ شوہر کے نکاح میں رہتی ہے۔

تا ہم اگر خاوند  قدرت رکھنے کے باوجود بیوی کے حقوق اور  نان نفقہ کی ادائیگی سے انکار کرےاور اس  پر ظلم کرے  ،جب کہ  ایسی صورت میں شوہر بیوی کو طلاق  دینے یا خلع  پر بھی  راضی  نہ ہوتا ہو تو شرعاً یہ شوہر متعنت کہلاتا ہے،لہذا یہ عورت  عدالت میں جا کر فسخ نکاح کا مطالبہ کرسکتی ہے،اس کے بعد اگر عورت  شوہر کے ظلم اور نان نفقہ کی عدم ادائیگی کو گواہوں  کے ذریعے سے ثابت کرے تو عدالت مکمل تحقیق کے بعد پہلے تو شوہر کو حکم دے گی کہ یا تو بیوی کو اپنے پاس عدل وانصاف کے ساتھ رکھے اور یااسے  طلاق دے ،اگر  شوہر نہ بیوی کو اپنے ساتھ عدل وانصاف کے ساتھ رکھنا چاہتا ہو اور نہ ہی وہ طلاق دینے پر راضی ہو تو عدالت عورت کو تنسیخ نکاح کی ڈگری دے سکتی ہے،اور شرعاً یہ تنسیخ معتبر شمار ہوگی،اور عدت گزرنے کے بعد یہ عورت دوسری جگہ نکاح  کر سکتی ہے۔   

صورت مسئولہ کے مطابق اگرلڑکی نے عدالت میں شوہر کے ظلم  کرنے اور حقوق ادا نہ کرنے کو گواہوں کے ساتھ ثابت کیا ہو تو تعنت ثابت ہونے کی وجہ سے عدالت کا فسخ نکاح کا فیصلہ شرعاً معتبر ہوگا۔تاہم اگر شوہر کا تعنت گواہوں یا اس کے اقرار سے ثابت نہ ہوا ہو  تو ڈگری شرعاً معتبر نہ ہوگی۔

قال اللہ تعالیٰ:﴿فإن خفتم ألا يقيما حدود الله  فلا جناح عليهما فيما افتدت به﴾. (البقرة:229)

قال فی الفتح: ومنھا أي من محاسنه جعله بيد الرجال دون النساء لاختصاصهن بنقصان العقل، وغلبة الهوى،ونقصان ا لدين. (رد المحتار على الدر المختار،كتاب الطلاق، ج:3، ص:229)

" ‌وإذا ‌تشاق ‌الزوجان وخافا أن لا يقيما حدود الله فلا بأس بأن تفتدي نفسها منه بمال يخلعها به ". (الهداية،كتاب الطلاق،باب الخلع،ج:2،ص:261)

وأما المتعنت الممتنع عن الإنفاق ففي مجموع الأمير ما نصه إن منعها نفقةالحال فلها القيام فإن لم يثبت عسره أنفق أو طلق و إلا طلق عليه ،قال محشيه أي طلق عليه الحاكم ۔(الحيلة الناجزة ،ص 133)