لینز کا استعمال دو طرح کا ہوتا ہے ایک  نظر کے لئے کہ  کسی کی بینائی کمزور پڑ جائے تو وہ عینک کی جگہ لینز لگاتا ہے اور دوسرے قسم کلر لینز  جو  زیب و زینت کے لیے لگا یا جاتا ہے  ان دونوں کے لگانے میں شرعا کوئی مضائقہ نہیں،البتہ خواتین کے لیے اس  بات کا لحاظ ضروری ہے کہ زیب وزینت  اپنے شوہروں کے لیے   کرنی ہو نہ کہ اجانب اورغیر محرموں کے لیے،نیزاس میں اللہ تعالی کی فطری خلقت کا تغیر و تبدل لازم نہ آتا ہو۔

               صورت مسئولہ میں اگر عورت کے لینز لگانے کی غرض بینائی کی کمزوری ہو یا زینت کے لیے ہو دونوں صورتوں میں لینز لگانا جائز ہے،بشرطیکہ اپنے شوہرکے سامنے خوبصورت بننا  مقصود ہو ،چنانچہ اگر نا محرموں کے سامنے زیب وزینت کا اظہار کرنا مقصود ہو تو ایسی صورت میں اس کا لگانا جائز نہیں ۔

قال الله تعالی:﴿وَلَا يبْدِينَ زِينَتهُنَّ إِلَّا لِبعُولَتِهِنَّ﴾(سورۃالنور:31)

وعن ابن عمر قال :قال رسول الله صلى الله عليه وسلم:"من تشبه بقوم فهو منهم".(مشکاۃالمصابيح،کتاب اللباس،الفصل الثانی،ص375)

وعن ابن مسعود قال :عن النبي صلى الله عليه و سلم قال : " المرأة عورة فإذا خرجت استشرفها الشيطان".(مشکاۃالمصابيح،کتاب النکاح،باب النظرإلی المخطوبةوبيان العورات،الفصل الثانی،ص:269)