واضح رہے کہ  اگر کوئی شخص  اپنی زندگی میں اولاد کے درمیان جائیداد  کو تقسیم کرنا چاہے تو اس کی اجازت ہے ،تاہم شرعاً یہ  میراث نہیں بلکہ ہبہ متصور ہوگا،اس تقسیم میں  لڑکوں اور لڑکیوں كے درمیان برابری کا لحاظ رکھنا چاہیے،کیونکہ نبی کریمﷺ نے اولاد کے مابین  ہبہ کرنے میں برابری کا حکم دیا ہے،تاہم اگر کسی بیٹے یا بیٹی وغیرہ کو اس کی خدمت،دینداری یا غربت کی وجہ سے کچھ زیادہ حصہ دیا جائے تو اس کی گنجائش ہے۔ نیزمرنے کے وقت جو  شخص کوئی مال  چھوڑ دے تو وہ ترکہ  شمار ہوتا ہے جو اس کے ورثا کے درمیان قانون شرعی کے مطابق تقسیم کرنا ضروری ہے۔

                 صورت مسئولہ کے مطابق  میت نے اپنی زندگی میں بیوی،بیٹے اور بیٹیوں کو ہبہ کے طور پر جو حصہ دیا ہے  اگر اس پر انہوں نے قبضہ بھی دیا تھا  تو وہ اس کےمالک شمار ہوں گے۔ البتہ اس شخص کی وفات  کے بعد اس کے متروکہ مال وجائیدادمیں سب زندہ ورثا کا حصہ ہوگا،چنانچہ بیوی کو آٹھواں حصہ ملے گا اور بیٹوں کو بیٹیوں کی بنسبت دگنا حصہ دیا جائے گا۔  

میـــــــــــــــــــــــــــــ(104)ـــــــــــــــــــــــــــــــــــــــــــــت

بیوہ    بیٹا       بیٹا      بیٹا       بیٹا      بیٹی     بیٹی     بیٹی      بیٹی      بیٹی

13    14      14      14       14       7      7        7         7       7

             بشرط صدق وثبوت اگر مرحوم کے مذکورہ بالا ورثا کے علاوہ کوئی اور قریبی وارث موجود نہ ہوتو بعد از ادائے حقوق متقدمہ علی الارث مرحوم کا  ترکہ ایک سو چار(104)حصوں میں تقسیم ہوکربیوہ کو13/104حصے، ہر ایک بیٹے کو 14/104حصے،جب کہ ہرایک بیٹی کو 7/104حصے دیےجائیں گے۔

قال اللہ تعالیٰ:﴿یوصیکم اللہ في أولادكم للذكر مثل حظ الأنثيين﴾ (النساء:11)

وقوله تعالى:﴿فإن كان لكم ولد فلهن الثمن مما تركتم﴾ (النساء:12)

عن النعمان بن بشيرأن أباه أتى به إلى رسول اللهﷺفقال:إني نحلت ابني هذا غلاما، فقال:"أكل ولدك نحلت مثله؟ قال:لا، قال:فأرجعه.(صحيح البخاري،كتاب الهبة وفضلها والتحريض عليها،الحدیث:2586)

وفي الخانية ‌ولو ‌وهب ‌شيئا ‌لأولاده في الصحة، وأراد تفضيل البعض على البعض روي عن أبي حنيفة لا بأس به إذا كان التفضيل لزيادة فضل في الدين وإن كانوا سواء يكره وروى المعلى عن أبي يوسف أنه لا بأس به إذا لم يقصد الإضرار وإلا سوى بينهم وعليه الفتوى.(ردالمحتار على الدر المختار،كتاب الوقف، مطلب مهم في قول الواقف على الفريضة الشرعية، ج:6، ص:664)